Actualidade Vigo, 4 de xaneiro de 2007 Nos hoteis Eurostar en Ourense Dous despedimentos por presentarse ás eleccións sindicais pola CIG   CIG-Comunicación- cig.prensa@galizacig.com   A CIG de Ourense vai realizar unha campaña que en primeiro lugar pasa pola denuncia ante o Xulgado do Social, reclamando a nulidade dos despedidos no Hotel Auriense para conseguir a readmisión ao posto de traballo. A CIG vai reclamar da Fiscalía que actúe neste caso, “igual que actúa contra os piquetes de sindicalistas en caso de folga”.   As eleccións nun dos hoteis máis importantes de Ourense, Hotel Auriense, preavisáronse para xaneiro e aos poucos días de facer o preaviso foron despedidos dous traballadores que a empresa sabía eran candidatos da CIG. Desde a comarca de Ourense relatan que pasos a nivel xurídico e social van dar para pór freo a este tipo de situacións. “Estes dous traballadores, un compañeiro e unha compañeira, levan na empresa desde o ano 2002 e non tiveron ningún problema até que chegou este tema das eleccións sindicais. Demóstrase claramente que foi un despedimento improcedente e que é un xeito de represalia sindical porque hai unha carta de despido na que se fala de falta de puntualidade e rendemento nos últimos meses, e resulta que acompañando esa carta de despido xa lle acompañaban outro escrito recoñecendo a improcedencia do mesmo e o dereito a percibir a indemnización por despido improcedente do mesmo”, relatan na CIG de Ourense. Para Etelvino Blanco, secretario comarcal da CIG Ourense, “isto demostra a desfachatez da empresa no tema, que o único que pretenden é evitar que os traballadores e traballadoras non teñan os e as representantes sindicais que eles querían que era en concreto un destes dous, porque quen preavisaramos as eleccións foramos a CIG”. A CIG de Ourense vai realizar unha campaña que en primeiro lugar pasa pola denuncia ante o Xulgado do Social, reclamando a nulidade dos despedidos para tratar de conseguir a readmisión ao posto de traballo. A CIG vai reclamar da Fiscalía neste caso que actúe, “igual que noutros casos actúa contra os piquetes de sindicalistas en caso de folga, pois que actúe e que sexa belixerante neste caso”. Os empresarios que vulneran claramente a liberdade democrática e a liberdade sindical están a vulnerar un dereito fundamental e por iso desde a CIG enténdese que se debe intervir tamén desde a propia Delegación de Traballo, dado que debe velar pola pureza do proceso electoral. Ademais a CIG tamén se vai dirixir á Inspección de Traballo e pretende facer mobilización social que en todo caso se concretarán máis adiante, durante todo o proceso que haxa de recursos ante ao Xulgado do Social. No caso de Ourense hai unha inxerencia clara dos empresarios en todo o proceso de eleccións sindicais, o que ten levado a despedimentos noutros casos como foi no centro de atención de chamadas, de Sodesho España, e despois inxerencias e represión sindical noutros.

Confederación Intersindical Galega www.galizacig.com ÚLTIMA REVISIÓN: 04/01/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta