Actualidade Vigo, 2 de febreiro de 2007 Delegadas e delegados do sector aprobaron a Plataforma Negociadora para o IV Convenio Colectivo Estatal A CIG aposta pola profesionalización do Telemárketing fronte á deslocalización   CIG-Comunicación- cig.prensa@galizacig.com   Fronte a actual temporalidade no sector de Telemárketing (ata un 70% do persoal de operacións das subcontratas ten contrato temporal), a CIG aposta pola estabilidade no emprego. Neste senso, unha das súas propostas é a creación dunha Bolsa de Emprego por provincias e dunha carreira profesional que valore a formación e a antigüidade na empresa. (Descarga a foto en tamaño tapiz para o escritorio de Windows 1024x768 ou 1280x960).   O día 1 de febreiro as delegadas e delegados da CIG do sector de Telemárketing aprobaron a Plataforma Negociadora para o IV Convenio Colectivo Estatal de Telemárketing. A CIG aposta por profesionalizar o sector como alternativa para frear a deslocalización. A pantasma da deslocalización é unha espada de Damocles para as máis de 8.000 persoas que traballan hoxe no Telemárketing en Galiza. Todas as alarmas saltaron o pasado verano polo despido de 700 persoas das subcontratas de Jazztel en A Coruña. Para a Central nacionalista, Galiza non pode competir con América Latina ou África en custes salariais; as empresas de Telemárketing deben realizar unha forte aposta por dar un servizo de calidade, que represente un maior valor engadido para as empresas usuarias e a súa clientela. Baixo esta perspectiva, a Plataforma da CIG para a negociación do IV Convenio Colectivo Estatal de Telemárketing máis alá das lóxicas reivindicacións laborais fai unha aposta decidida pola profesionalización do sector. Fronte a actual temporalidade (ata un 70% do persoal de operacións das subcontratas de Telemárketing ten contrato temporal), a CIG aposta pola estabilidade no emprego. Neste senso, unha das súas propostas é a creación dunha Bolsa de Emprego por provincias similar á recentemente creada nas subcontratas do Naval no Convenio do Metal de Pontevedra. Tamén solicitan a creación dunha carreira profesional que valore a formación e a antigüidade na empresa. Para a CIG este Convenio pode e debe abrir as portas a un novo modelo empresarial que garanta a viabilidade do sector de Telemárketing galego cara ao futuro.

Confederación Intersindical Galega www.galizacig.com ÚLTIMA REVISIÓN: 02/02/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta