Actualidade / Artigo Vigo, 13 de febreiro de 2007 Así abaratan o custe salarial dos contratos de posta a disposición na negociación colectiva   Clodomiro Montero Martínez- secbanca@galizacig.net   Cada día son máis numerosos os Convenios Colectivos que establecen medidas co fin de burlar a equiparación salarial do persoal de ETT's. Este é o caso do Convenio Colectivo das Caixas de Aforros. (Foto: Publicidade das Caixas de Aforros nun edificio de A Coruña. ©galizacig.com).   A Lexislación que regula o funcionamento das Empresas de Traballo Temporal (ETT) establece que os traballadores/as postos a disposición, é dicir cedidos por Empresas de Traballo Temporal, teñen dereito a percibir o salario establecido no Convenio Colectivo da empresa usuaria. Cada día máis Convenios recollen medidas que permiten ás empresas burlar a lei abaratando o custe salarial do persoal procedente de ETT's. A equiparación supuxo unha incuestionable mellora fronte ao establecido no Convenio Estatal de Empresas de Traballo Temporal asinado no seu día por CCOO e UGT. Destacar que a Lei que equiparaba o salario do persoal das ETT ao das empresas usuarias non foi froito do “diálogo social”, senón da acción sindical e social contra estas empresas. En todo caso cada día son máis numerosos os Convenios Colectivos que establecen medidas co fin de burlar a equiparación salarial do persoal de ETT's. Este é o caso do Convenio Colectivo das Caixas de Aforros. É necesario lembrar que o salario do persoal cedido calcúlase por hora, dividindo o salario anual pola xornada en cómputo anual establecida en Convenio. No último Convenio crearon un novo nivel salarial para o persoal de nova entrada denominado nivel XIII, cun salario un 20% por baixo do establecido ata ese momento. A xornada en cómputo anual está establecida en 1.680 horas, superando a xornada real efectiva anual en 120 horas. Así, aplicando o novo nivel salarial e a xornada en cómputo anual inflada, o salario é o seguinte: Nivel Salario anual Xornada anual Custe hora Nivel XIII 14.287,92 1.680 8,50 euros Se facemos o mesmo cálculo sobre a anterior categoría de entrada nas caixas e tendo en conta a xornada en cómputo anual real o cálculo sería o seguinte: Nivel Salario anual Xornada anual Custe hora Nivel XII 17.859,90 1.560 10,63 euros Coas medidas pactadas, un traballador/a de ETT cobra 2,13 euros menos á hora. A xornada en cómputo semanal é de 36,50 horas, o que se traduce na seguinte perda salarial para este persoal: Diferenza Horas semanais Perda semanal Perda mes 2,13 euros 36,5 77,14 euros 311 euros Ante o inicio do proceso de negociación colectiva en numerosos sectores debemos pular pola eliminación das categorías ou niveis salariais creadas para o persoal de nova entrada, así como incidir na necesidade de que calquera redución da xornada teña a súa correspondencia na redución da xornada en cómputo anual. Doutro xeito podemos colaborar, sen ser conscientes, a abaratar o custe dos contratos de posta a disposición estendendo o seu uso nos distintos sectores.

Clodomiro Montero Martínez, secretario nacional da Federación de Banca da CIG. (Máis artigos...)

Confederación Intersindical Galega www.galizacig.com ÚLTIMA REVISIÓN: 14/02/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta