|
Actualidade
A Coruña, 8 de marzo de 2007
Os grupos nacionais A Quenlla, Os tres trebóns
e mais Dandy Fever actuarán pola tarde no Cantón
10 de Marzo: xornada reivindicativo-festiva en Ferrol
Ofrenda floral, manifestación, xantar
popular, proxección do documentario “Metal en loita” e concertos son os actos programados en Ferrol pola
CIG para este 10 de Marzo, Día da Clase Obreira Galega.
Os actos conmemorativos do 10 de Marzo comezarán
en Ferrol ás 12:30 horas na praza homónima, onde a CIG realizará unha ofrenda floral perante
a estatua dedicada a Amador Rei e Daniel Niebla, os dous traballadores de Bazán asasinados pola policía
franquista durante unha manifestación operaria celebrada o 10 de marzo de 1972.
De seguido, partirá deste mesmo sitio unha
manifestación que percorrerá as rúas ferrolás até chegar ao Cantón, onde
se celebrará un xantar popular. Neste mesmo lugar e xa pola tarde, proxectarase ás 16:30 horas o
documentario “Metal en loita”, elaborado por FESGA, que versa sobre o conflito que se deu o ano pasado neste sector
na provincia de Pontevedra.
A música e os concertos chegarán
a partir das 18:00 horas, coas actuacións de A Quenlla
(música tradicional), Os tres trebóns
(mestizaxe) e Dandy
Fever (ska, rocksteady).
| |
 |
| Xesús Anxo López Pintos, secretario
comarcal da CIG-Ferrol, lembrou Amador e Daniel no decurso da presentación da programación deste
10 de Marzo. (Na foto, de esquerda a
dereita, Manel Grandal, responsábel de prensa da CIG-Ferrol; Xesús Anxo López Pintos, secretario
comarcal; e Fran Cartelle, secretario comarcal de Organización. ©galizacig.com 07/03/2007). |
| |
Xesús Anxo López Pintos, secretario
comarcal da CIG-Ferrol, lembrou Amador e Daniel no decurso da presentación da programación deste
10 de Marzo. Subliñou que os dous traballadores foron asasinados pola policía franquista por reclamar
un convenio colectivo propio. “Agora a CIG mobilízase pola consecución do marco galego de relacións
laborais que permita a negociación dos convenios na Galiza”. “Pouco mudaron desde hai 35 anos as relacións
laborais –prosegue López Pintos– e os sindicatos españolistas, UGT e CCOO, negocian e asinan en Madrid
cos empresarios a moderación salarial, no mal chamado Pacto Social”. O secretario comarcal de CIG-Ferrol
enfatizou na necesidade de que, no Día da Clase Obreira Galega, os traballadores e traballadoras do país
reivindiquen os seus dereitos como clase.
|
