Actualidade Santiago, 28 de marzo de 2007 CIG-Ensino lamenta esta posición inamovíbel a pesar de avalar a demanda máis de 5.000 sinaturas do profesorado en catro días A Consellaría de Educación mantén a proposta de eliminar o horario en xornada matinal en xuño e setembro   CIG-Comunicación- cig.prensa@galizacig.com   Ante o requirimento da CIG sobre a posición da Consellaría no relativo á recuperación da carga horaria de Tecnoloxía, Plástica e Música na ESO e despois das nutridas mobilizacións levadas a cabo e das sinaturas recollidas, a Consellaría manifestou que está estudando o tema. (Foto: Mobilización convocada pola CIG-Ensino o 21 de marzo por un Ensino de calidade. ©galizacig.com 21/03/2007).   A CIG-Ensino lamenta a posición inamobíbel da Consellaría de Educación de eliminar a xornada intensiva en horario de mañá nos meses de xuño e setembro, malia as súas demandas ter sido apoiadas por máis de 5.000 sinaturas do profesorado afectado, da maioría dos centros do país, o que significa un amplísimo apoio á campaña iniciada hai só catro días e que se traduciu na chegada de máis de mil sinaturas diarias, que se incrementan hora a hora, pois seguen recibindo avais sen interrupción. A existencia dunha xornada lectiva continuada en horario matinal nos meses de setembro e xuño ten a finalidade de estabelecer un acceso gradual desde o período de vacacións ao período lectivo no mes de setembro, e de atenuar a incidencia do cansazo acumulado de todo o curso durante o mes de xuño, período que coincide coas avaliacións finais. Sempre se considerou que este tipo de xornada era a máis axeitado para o alumnado, así se veu recollendo ao longo dos anos. Por iso, CIG-Ensino manifesta o seu desacordo coa modificación que propón a Consellaría, ao entender que repercute negativamente na adaptación do alumnado e porque é totalmente compatíbel coa oferta do servizo de comedor escolar. Para a CIG-Ensino a verdadeira conciliación da vida laboral e familiar non depende da ampliación do horario lectivo nin de estender a xornada partida a todo o curso escolar, senón de dotar de servizos complementarios (transporte e comedor) e actividades extraescolares os centros, independentemente de que sexan rurais ou urbanos e da modalidade de xornada lectiva (continuada ou partida). Cuestión que con este tipo de proposta a Consellaría non garante. A Consellaría non asumiu ningunha proposta que pasase porque os centros que teñen xornada de mañá e tarde poidan ter xornada lectiva intensiva matinal durante os días lectivos dos meses de setembro e xuño. En todo caso, para a CIG-Ensino o tema non está pechado, queda tempo para a súa negociación (o curso pasado negociouse un mes máis tarde) e xa advirte que non vai aceptar esta imposición da Consellaría. A Federación de Ensino da CIG adianta que estudará as medidas a levar a cabo e chamará ao profesorado á mobilización. “É totalmente inaceptábel que a Consellaría non sexa receptiva a unha demanda tan amplamente avalada pola maioría dos centros e do profesorado, modificando unha xornada que sempre estivo en vixencia e nunca foi cuestionada”, explica Anxo Louzao. O secretario nacional de CIG-Ensino lamenta ademais que a posición da Consellaría de Educación, neste tema, así como no relativo á negativa a negociar a oferta de emprego e a estabilidade para o profesorado interino, se asemelle ao comportamento seguido pola Consellaría anterior. Aínda hai tempo suficiente para a rectificación, polo que fan un chamamento á Conselleira, como máxima responsábel de Educación, para que sexa receptiva ás propostas da CIG-Ensino co aval do profesorado. Cargas horarias na ESO Ante o requirimento da CIG sobre a posición da Consellaría no relativo á recuperación da carga horaria de Tecnoloxía, Plástica e Música na ESO e despois das nutridas mobilizacións levadas a cabo e das sinaturas recollidas, a Consellaría manifestou que está estudando o tema e que dará cumprida información da súa posición final no Consello Escolar de Galiza que se celebrará na sede do MUPEGA. A CIG agarda que a Consellaría conclúa a necesidade de ampliar os horarios obrigatorios destas materias.

Informacións relacionadas 24/03/2007 Protestan así pola redución de carga horaria nos ámbitos artístico e tecnolóxico, fundamentais na formación básica do alumnado O profesorado de Plástica decide non participar nunhas xornadas da Consellaría de Educación 22/03/2007 A Consellaría retira a proposta de calendario ante a presión sindical Preto de mil profesores/as secundan a mobilización convocada pola CIG-Ensino 21/03/2007 O mércores 21 de marzo, ás 11:30 horas, con saída da Praza da Quintana Manifestación do profesorado de Tecnoloxía, Música e Plástica en Compostela 15/03/2007 Relixión incrementa o mínimo exixido fixado polo MEC, tendo maior carga docente que tecnoloxía, música e educación plástica e visual CIG-Ensino demanda da Consellaría que reconsidere a súa proposta de currículo da ESO 06/03/2007 Denunciou que non se estea fomentando a participación do profesorado na elaboración dos currículos CIG-Ensino lamenta a cerrazón da Consellaría a aceptar propostas de distribución horaria das materias da ESO

Confederación Intersindical Galega www.galizacig.com ÚLTIMA REVISIÓN: 28/03/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta