Actualidade Vigo, 8 de marzo de 2007 22 paneis contra as discriminacións Unha exposición da Secretaría da Muller visibilizará nas rúas de Vigo a acción feminista   CIG-Comunicación- cig.prensa@galizacig.com   Muller, participa e loita!   As mulleres da CIG pendurarán decenas de paneis ao longo do percorrido da mobilización que este 8 de marzo terá lugar na cidade de Vigo, despois dunha asemblea de delegadas e delegados na que se fará especial fincapé na importancia da introdución das políticas de igualdade na negociación colectiva para combater a precariedade. Nesta xornada do Día da Muller Traballadora a Secretaría da Muller da Comarca de Vigo, ademais de participar na devandita asemblea de delegadas e delegados e na mobilización posterior, a través destes paneis quere amosar os atrancos cos que se atopan as mulleres no ámbito laboral e as propostas que desde a Secretaría da Muller se teñen presentado para combater esta situación. Nesta exposición tócanse distintas temáticas. Por un lado, hai un grupo de paneis que rodearán o Monumento ao Traballo situado na rúa Gran Vía, no que aparecen uns fortes homes tirando dunhas redes. Nestes cartelóns aparecen mulleres redeiras, conserveiras, mariscadoras, traballadoras na lonxa, para valorizar a importante presenza das mulleres como traballadoras no mar; e así criticar esta construción artística e simbólica que baixo o nome de Monumento ao Traballo exclúe e invisibiliza ás mulleres e a súa vital importancia no mundo do traballo. Outra das cuestións que abordan estes paneis son as distintas campañas e accións que desde a Secretaría da Muller se teñen programado, contra a linguaxe sexista, pola denuncia do acoso, contra a violencia de xénero, contra a precariedade e tamén aparecen as distintas mobilizacións feministas, sociais e sindicais das que a Secretaría da Muller da CIG ten participado. E por último, un importante número de cartelóns inciden na situación sociolaboral das mulleres, nas categorías profesionais, na necesidade da conciliación, nos atrancos e dificultades cos que se encontran as mulleres, por moita cualificación que teñan, e fronte a iso as medidas que desde a Secretaría da Muller da CIG se propoñen para combater a precariedade e a situación actual das mulleres galegas. Muller, participa e loita!

Informacións relacionadas 07/03/2007 Muller, participa e loita! Asembleas e concentracións en todas as comarcas os días 7 e 8 de marzo Elvira Patiño, secretaria confederal de Muller e Servizos Sociais: “A negociación colectiva é a mellor ferramenta que temos as traballadoras para fixar a igualdade” 06/03/2007 Muller, participa e loita! 8 de Marzo, Día Internacional da Muller 8 de Marzo, Día da Muller Traballadora A taxa de temporalidade da muller acadou o 38,6% en 2006

Confederación Intersindical Galega www.galizacig.com ÚLTIMA REVISIÓN: 08/03/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta