|
Actualidade CIG-Comunicación-
Se o 29 de marzo na folga xeral pola carreira profesional xuntábanse, nun grande éxito de mobilización, máis de 3.500 persoas, desta volta, 26 de abril, nas rúas de Vigo eran máis de 1.500 traballadores e traballadoras do Sergas, máis de 2.000 en A Coruña, preto de 500 en Lugo e máis de 500 en Ourense. Xan Cons, secretario nacional da CIG Saúde, avaliou “moi satisfactoriamente” esta nova mobilización e folga xeral “que amosa que esta loita non languidece e que, aínda que moitos nos acusaron de que só era unha cuestión electoralista que remataría o 18 de abril, continuaremos con forza reivindicando os nosos dereitos, e agora agardaremos que o Sergas mova ficha”. A incidencia da folga mantense nun nivel moi alto, nun 78,7%, algo superior aos últimos paros parciais. Para Xan Cons, este alto seguimento demostra que “non funcionou a táctica do Sergas, que era a de desmobilizar ao sector na mesa que mantivemos o mesmo martes desta semana. Non tiñan vontade de achegar posturas nin acordar nada senón que querían desmobilizar a unha parte do colectivo, en concreto ofrecía melloras para o grupo C e D, melloras orientadas a desmobilizar, e que deixaba fora ao grupo E, que é o que ten o nivel máis baixo de salario e no que están os pinches e celadores, por exemplo”. O 8 de maio, de novo, está convocada unha folga xeral, que se repetiría o 15, 16 e que a partir do 22 de maio sería indefinida, de martes a venres todas as semanas. Neste sentido, Cons subliñou que quedan pendentes temas importantes por resolver como “a discriminación respecto aos anos, a situación do persoal laboral e funcionario, e a discriminación que existe tamén respecto ao complemento salarial”. Cons engadiu que “a plataforma sindical e a unidade continúa forte, a partir de agora e até a nova convocatoria de folga xeral, e se non hai avanzos na negociación, a actividade vaise centrar en actividades de presión que consigan que o Sergas convoque de novo a mesa sectorial”. De feito, este venres os traballadores e traballadoras do Sergas están convocados diante do Teatro García Barbón en Vigo, xa que María Xosé Rubio, conselleira de Sanidade, ven presentar o concurso de proxectos para o novo Hospital para Vigo, nun acto propagandístico, mentres o persoal do Sergas continúa en loita por unhas condicións laborais dignas. |
||||||||||||||||||
Informacións relacionadas
|
||||||||||||||||||
|
||||||||||||||||||
|
ÚLTIMA REVISIÓN: 27/04/2007 |
||||||||||||||||||
|
