|
Actualidade CIG-Comunicación-
Este venres tiña lugar unha nova xornada de folga nos seis centros de traballo da Inspección Técnica de Vehículos da provincia de Pontevedra, que afectou a un total de 1.200 vehículos máis. Os traballadores en folga concentráronse diante do edificio da Xunta na Praza da Estrela en Vigo de 11:30 a 13:30 para reclamar unha solución a este conflito no que as principais demandas continúan a ser: non traballar os sábados á tarde, o período de vacacións (que poda ser escollido polo traballador e non imposto pola empresa) e a paga voluntaria, que non sexa outorgada baixo criterios subxectivos. Unha delegación do Comité de Empresa, cos secretarios comarcais da Federación do Metal de Vigo da CIG, Manuel Simón, de Pontevedra, Marcos Conde, e o secretario nacional de Negociación Colectiva, Xoán Xosé Bouzas, mentres tiña lugar esta concentración ás portas da Xunta en Vigo foi recibida polo delegado de Traballo, que se comprometeu a que a vindeira semana posibilitaría que houbera unha reunión na que estarían presentes a empresa concesionaria da ITV, Supervisión y Control SA, a Consellaría de Industria, a Consellaría de Traballo e os traballadores afectados. Os traballadores de todos os centros despois desta concentración mantiveron un xantar, despois do que tivo lugar unha asemblea con ampla participación, na que decidiron volver ao traballo con normalidade para a semana que entra, para amosar tamén deste xeito a súa dispoñibilidade e boa vontade para chegar a un entendemento coa empresa, xa que consideran que só están a reclamar unhas condicións dignas de traballo que deberan ser asumidas por todas as partes. Neste sentido, decidiron manter a folga convocada de 13 a 19 horas dos sábados 21 e 28 de abril, xa que esta é unha das súas reivindicacións básicas, a de non traballar os sábados á tarde. Ao mesmo tempo, presentaron no rexistro da Consellaría de Traballo unha nova convocatoria de folga para os días 2, 3 e 4 de maio, xa que no caso de que na xuntanza da vindeira semana non houbera avances, están decididos a continuar na loita pola reivindicación dunhas condicións dignas para os traballadores da ITV. |
||||||||||||
Informacións relacionadas
|
||||||||||||
|
||||||||||||
|
ÚLTIMA REVISIÓN: 21/04/2007 |
||||||||||||
|
