Actualidade A Coruña, 13 de abril de 2007 A central nacionalista valora como positiva esta xuntanza Reunión da CIG coa Axencia Española de Protección de Datos   CIG-Comunicación- cig.prensa@galizacig.com   Dende a CIG valorouse moi positivamente esta xuntanza e estase estudando a posibilidade de presentar alegacións ás autorizacións para as transferencias internacionais de datos da clientela de Telefónica e Telefónica Móviles, a países como Perú ou Colombia, que están considerados como países non seguros na protección de datos por parte da Unión Europea. (Foto: Sede da Axencia Española de Protección de Datos en Madrid).   O pasado día 11 de abril tivo lugar en Madrid unha reunión dunha representación da Federación de Banca, Aforro e Telemárketing da CIG cos responsables da Axencia Española de Protección de Datos (AEPD). Esta xuntanza coa máxima autoridade española en materia de protección de datos, solicitada pola Central Sindical, veu motivada polas numerosas autorizacións de transferencias internacionais de datos concedidas ás grandes empresas de telefonía, que están a posibilitar a deslocalización no sector de Telemárketing. Por parte da Axencia estivo presente o seu director xeral, Artemi Rallo, xunto co resto do equipo de dirección da mesma. Por parte da CIG asistiu o secretario nacional da Federación, Clodomiro Montero, a representante do sindicato na negociación do convenio de Telemárketing, Ayda Mallo, e a representante da Sección Sindical da CIG na empresa Atento, Mónica Díaz. Durante a reunión informouse aos responsables da Axencia da situación creada no sector polas graves repercusións sobre o nivel de emprego no Estado e nomeadamente en Galiza, onde se teñen producido despedimentos colectivos en empresas como Jazztel ou máis recentemente en Atento-A Coruña. Os responsables da Axencia amosaron a súa sensibilidade coa situación laboral motivada pola deslocalización do sector de Telemárketing, malia non estar dispostos a revisar as decisións tomadas ata o de agora, entendendo que as actuacións deste ente público, dependente do Ministerio de Xustiza, foron realizadas dentro da máis estrita legalidade. Tamén informaron que as denuncias presentadas pola CIG contra Jazztel, cando se produciu a deslocalización de servizos dende A Coruña cara Arxentina, deron lugar á apertura dun expediente informativo e dunha investigación por parte da Axencia que a día de hoxe aínda continúa aberta. Dende a CIG valorouse moi positivamente esta xuntanza e estase estudando a posibilidade de presentar alegacións ás autorizacións para as transferencias internacionais de datos da clientela de Telefónica e Telefónica Móviles, a países como Perú ou Colombia, que están considerados como países non seguros na protección de datos por parte da Unión Europea. Tamén se está contemplando outro tipo de medidas legais que se poidan interpoñer neste tema, das que dará cumprida información no caso de ser levadas adiante.

Informacións relacionadas 27/03/2007 Estas autorizacións poden pór os alicerces dun novo proceso de deslocalización das empresas de Telemárketing de A Coruña A CIG esíxelle ao Goberno español que paralice a cesión de datos de usuarios de telefonía ao estranxeiro

Confederación Intersindical Galega www.galizacig.com ÚLTIMA REVISIÓN: 13/04/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta