|
Actualidade CIG-Comunicación-
O secretario comarcal da CIG de Vigo, Xerardo Abraldes, presentou este xoves os actos que a CIG organiza desde esta comarca para o 1 de maio. En primeiro lugar presentou a manifestación, convocada pola CIG, que sairá ás 12 da mañá do cruce da Doblada con Urzaiz, e que percorrerá Urzaiz, Colón e Policarpo Sanz, até rematar na Porta do Sol. Os lemas que este ano centran a campaña do 1 de maio son “Contra os recortes sociais” e “Galiza nación, autodeterminación”. Nesta manifestación participará Suso Seixo, secretario xeral da CIG. Abraldes nesta rolda de prensa lembrou que “o 1 de Maio é o momento para facer un resumo e balanzo do ano sindical”. Neste sentido, recordou que neste ano se asinou a reforma laboral na que se abaratou o despedimento. Cuestións como a temporalidade, “na actualidade 8,4 de cada 10 contratos son eventuais”, continúa a ser outro dos índices que conforman a precariedade laboral no noso país. Outra das reformas que se deron na lexislación laboral foi a da reforma das pensións, “na que se instaura unha discriminación no tema da xubilación anticipada, entre outros temas”. A actuación das mutuas tamén foi outras das cuestións centrais da crítica, xa que “nun mundo no que a sanidade e un dereito público e universal, non se entende como no mundo do traballo se da outra realidade distinta, no que se producen altas indebidas, acortamento dos procesos de convalecencia, e mesmo casos que promoven as mutuas de xente que non está coa alta médica pero lles cortan a prestación económica”. E todos estes problemas actuais, “teñen unha relación directa coa nosa falta de capacidade de goberno e decisión como pobo” sinalaba Abraldes, “por iso o segundo lema de Galiza nación, autodeterminación, coa reclamación histórica do sindicalismo nacionalista dun marco galego de relacións laborais”. Nesta rolda de prensa tamén estiveron presentes Beatriz Caamaño, responsábel de Finanzas e Persoal, e Chelo Lago, responsábel comarcal de Formación. Aproveitaron tamén esta rolda de prensa para informar doutros actos, ademais da manifestación, que terán lugar esa data. O primeiro deles é un xantar de confraternidade, en colaboración co Sindicato Labrego Galego, que se realizará no Parque de Castrelos baixo unha carpa, e con produtos agroecolóxicos. A terceira actividade programada para esta data é un concerto, organizado pola CIG Mocidade, que comezará ás 18:30 no Parque de Castrelos. Os grupos que actuarán serán Nao (rap metal), Festicultores (música balcánica) e Skárnio (ska). Desde a CIG estase a realizar unha intensa actividade de propaganda e difusión de todos estes actos, coa pegada de carteis e faixas ao longo da comarca de Vigo, así como con megafonía, para facer un chamamento a todos os traballadores e traballadoras para que asistan masivamente a estes actos. Na rolda de prensa de Pontevedra estiveron presentes Delmiro Durán, responsábel de Acción Sindical, e Rosa Abuín, responsábel de Organización da Comarca de Pontevedra. Nesta rolda de prensa explicaron tamén os temas centrais deste 1 de Maio en Pontevedra, así como explicaron porque a CIG fai esta convocatoria en solitario, e non con CCOO e UGT, “xa nin tan sequera pensamos niso, despois de ver durante este ano como continuaban a asinar acordos como os de Madrid, de contención salarial e dando ás costas aos traballadores/as, non podemos pensar neste contexto na unidade sindical”, criticaba Delmiro Durán. A convocatoria de manifestación do 1 de Maio sairá en Pontevedra da Praza da Ferreiría ás 12:30. |
|||||||||
Informacións relacionadas
|
|||||||||
|
|||||||||
|
ÚLTIMA REVISIÓN: 27/04/2007 |
|||||||||
|
