|
Actualidade CIG-Comunicación-
Este 3 de maio volveron parar os centros de traballo da ITV da provincia de Pontevedra polas mesmas tres razóns polas que xa levan convocados once xornadas de folga: non traballar os sábados á tarde, o período de vacacións (que impón a empresa e non negocia cos traballadores), e a paga voluntaria, que non sexa outorgada baixo criterios subxectivos. Dado a pasividade e a inmobilidade da Xunta de Galiza, e en concreto da Consellaría de Industria (empresa que é a que contrata a concesionaria do servizo de ITV), e a Consellaría de Traballo, os traballadores en folga dos centros de traballo da ITV da provincia de Pontevedra decidiron convocar unha concentración ás 12 da mañá este venres 4 de maio diante da Consellaría de Industria de Pontevedra. O seguimento da folga continúa a ser do 100%, e están a pechar todos os centros de traballo durante as horas de paro. Ademais dos centros de Peinador, O Porriño, Curro, Pontebora, Lalín e Vilagarcía, a unidade móbil tamén está a seguir esta folga, e de feito obrigaron a esta unidade móbil a desprazarse desde A Estrada este mércores e este xoves e venres até Portonovo en Sanxenxo, pero os traballadores, malia ao desprazamento, continuaron co seguimento da folga. Despois da concentración na Consellaría de Industria haberá unha nova Asemblea de traballadores para determinar que xornadas de folga novas se van convocar ou que novas medidas de presión se van levar adiante. Aínda que o seguimento da folga é total, no centro de traballo da ITV de O Porriño houbo desde o comezo da folga unha persoa, José Luís Pérez, delegado da UGT, que non participou da folga co resto dos seus compañeiros, senón que acudía todos os días de paros ao centro de traballo para amosar que non traballaba pola presenza dos piquetes, pero ameazou aos seus compañeiros e amosou sempre unha actitude anti-sindical e que atentaba contra a solidariedade entre os traballadores. Do que nun comezo foron ameazas o pasado venres pasaron aos feitos, e este esquirol acudiu ás portas do domicilio persoal dun compañeiro da CIG Metal pola noite para agredilo. O traballador tivo que ser atendido en Urxencias, presentou denuncia ante a Garda Civil, pero aínda a día de hoxe atópase con este esquirol da UGT que o persigue a súa casa, que o acosa e que o ten ameazado de morte. Tamén os outros compañeiros da ITV de O Porriño están ameazados polo esquirol, e estes traballadores tamén detectaron que este delegado da UGT os persegue até os seus domicilios particulares. |
||||||||||||||||||
Informacións relacionadas
|
||||||||||||||||||
|
||||||||||||||||||
|
ÚLTIMA REVISIÓN: 04/05/2007 |
||||||||||||||||||
|
