|
Actualidade CIG-Comunicación-
De novo, e desde as sete da mañá, comezaban as asembleas nos distintos centros de traballo para determinar as accións da xornada e debater a situación do conflito. Así, preto das nove da mañá comezaban as marchas desde os distintos estaleiros. Nos estaleiros da Ría de Pontevedra tamén tiñan lugar asembleas a primeira hora da mañá, nas que os traballadores decidiron realizar piquetes informativos. Desde Barreras comezaban as marchas con cortes de tráfico polo centro de Vigo, desde Praza de América, Praza de España, Urzaiz, cruce de Colón e até os principais nós de comunicación do centro de Vigo, así como tamén na zona de Beiramar ou nos túneles de Bouzas, onde se unían tamén os compañeiros do estaleiro de Vulcano, que viñan de paralizar a rotonda do Porto durante 45 minutos e tamén de cortar a autopista nos dous sentidos durante 15 minutos. Ás doce da mañá os traballadores partían cara á Praza do Rei, para celebrar unha asemblea, realizando novos cortes de tráfico.
Ao mesmo tempo, ás 11:30 horas, as catro organizacións sindicais (CIG, CUT, CCOO e UGT) estaban convocadas pola Consellaría de Traballo e na súa Delegación a unha xuntanza á que acudiron. Finalmente, a Asociación de Industriais Metalúrxicos (ASIME) non apareceu nesta xuntanza, por considerar, segundo comunicaron mediante fax, que non hai nada que negociar, e acusaron aos traballadores de estar a prexudicar gravemente o sector. Así o explicaba Miguel Malvido, secretario nacional da CIG Metal, que afirmou que “a patronal nos quere botar un pulso, e que conte con nós, que este sector xa está afeito aos conflitos longos”. Miguel Malvido subliñou tamén a cantidade de empresas que pola Inspección de Traballo e as denuncias dos sindicatos desde novembro se viron na obriga de transformar un 75% dos contratos eventuais en fixos, pero que “continúa a haber un alto número de empresas das que se descoñece a porcentaxe de fixos e eventuais, e tamén outras moitas que continúan a incumprir a porcentaxe do 45% de fixos fixada polo Convenio provincial do Metal”. Malvido denunciou tamén a contratación eventual que se está a dar por fóra da bolsa de emprego, e a falta de regulación que está a haber sobre esta cuestión. Miguel Malvido foi a única persoa que interveu nesta asemblea de traballadores para amosar a forza da unidade sindical, que continuará este martes desde os distintos centros de traballo. |
|||||||||||||||||||||
Informacións relacionadas
|
|||||||||||||||||||||
|
|||||||||||||||||||||
|
ÚLTIMA REVISIÓN: 08/05/2007 |
|||||||||||||||||||||
|
