|
Actualidade CIG-Comunicación-
Ás sete e media da mañá partían os distintos piquetes cara os centros de traballo a informar da folga e animar aos traballadores a participar das concentracións que terían lugar a partir das doce da mañá. Na zona sur da provincia houbo piquetes en O Porriño, Salceda, Salvaterra, Baiona, Tui, Nigrán, Arcade, Redondela, O Morrazo, Gondomar, e na cidade de Vigo na zona de Cabral, Travesia de Vigo, Aragón, Teis, Sanjurjo Badía, toda a zona centro, Navia, Pi i Margall, Hispanidade, Ramón Nieto... Na zona norte da provincia houbo piquetes no Deza, Salnés (Vilagarcía, Cambados) e na propia cidade de Pontevedra, na que houbo dous piquetes moi numerosos de máis de cen persoas. A loita por un convenio provincial que mellore as condicións de traballo e incorpore melloras salariais, de saúde laboral e sociais para os traballadores da Construción daba comezo deste xeito desde primeira hora da mañá nos distintos e dispersos centros de traballo de toda a provincia. Os paros foron masivos en todas as zonas, obtendo un seguimento total na maioría das zonas nas obras principais e visíbeis. De feito, Xosé Xoán Melón, secretario nacional da CIG Construción, avaliou moi positivamente esta primeira xornada en canto aos paros xa que “partiu a propia iniciativa de parar da maioría das empresas, e os traballadores incorporábanse á folga con pouca explicación; a xente sentíase moi identificada cos motivos da folga, e valoramos moi satisfactoria esta sintonía cos traballadores do sector”. Nestes paros tamén se somaron por primeira vez traballadores inmigrantes, algúns deles afiliados da CIG, que secundaron a folga, e tamén unha parte deles acudiron ás mobilizacións.
Desde os piquetes, os traballadores de Vigo trasladáronse á Porta do Sol, onde cortaron o tráfico durante dúas horas desde as doce, nas que agardaron pola chegada dos distintos grupos de traballadores que viñan dos piquetes da zona sur da provincia. Na cidade de Pontevedra ás doce tiveron unha asemblea no Salón de Actos da Casa Sindical, onde decidiron saír e concentrarse diante da sede de Indeza no centro desta cidade, empresa do presidente da Patronal da Construción, Ángel Fernández Presas. Máis de 150 traballadores participaron desta concentración. Na concentración de Vigo centos de traballadores pasaron por este punto de encontro, no que interveu o secretario nacional da CIG Construción, Xosé Xoán Melón, para sinalar que “poñemos tres condicións para volver ás negociacións: que se reinicien de manera inmediata, que se fixe un calendario con datas concretas, e que o eixo da negociación, aberto ás demais posíbeis propostas e aportacións, sexa o anteproxecto de convenio que presentou a CIG a finais do mes de febreiro”. Melón tamén tratou a cuestión da convocatoria dunha folga indefinida no sector para mediados de xuño, se a situación actual non se desbloquea, para “que todo este proceso remate nun convenio con melloras para os traballadores, onde se recoñezan complementos salariais, se modifiquen as xornadas e que se solucione a situación de precariedade e descontento no sector”. Neste sentido falou da escusa presentada pola patronal de que non se pode negociar o convenio provincial até que non remate a negociación do convenio estatal “como unha táctica dilatoria, que de nada vai servir, porque temos toda a lexitimidade, mesmo con sentenzas gañadas a este respecto, para negociar desde este espazo”.
Melón valoraba á tarde estas mobilizacións e facía fincapé en que “este era un sector que levaba moitos anos sen mobilizarse e era un pouco sorpresa o que puidera pasar, pero tamén a concentración en Vigo foi moi positiva xa que pasaron durante todo o tempo que estivemos concentrados na Porta do Sol máis de mil persoas, que significa ter mil traballadores activos na defensa da nosa proposta de convenio e negociación colectiva”. Melón lamentou a posición de CCOO e UGT nesta folga porque “fixeron un traballo en contra da folga mentres a patronal estaba calada, e agardamos que corrixan esta postura”. Para Melón nesta xornada demostrouse que “hai dous modelos de sindicalismo na Construción: un sindicalismo combativo de defensa dos intereses dos traballadores que representa a CIG, e outro sindicalismo, decadente e pactista, que só quere adormecer ao sector. O problema é deles, que teñen moi difícil defender estas posturas diante dos traballadores”. Sobre a patronal, e a actitude neste conflito Melón incidiu que “non están á altura das circunstancias, e sobre todo, a persoa do seu presidente non entende o que son as relacións laborais, e somete os seus intereses aos dunha estratexia que se deseña en Madrid, e desde esa postura só van conseguir meterse nun conflito permanente co sector”.
Alberte Fernández, secretario comarcal da Construción de Vigo avaliaba que “tanto en Vigo, como no seu entorno o paro foi masivo e a resposta da xente foi moi boa”, e destacou que neste conflito “a patronal está abocada a cambiar de postura, xa que non pode continuar a limitarse a obedecer o que lle din desde Madrid”. Xaquín Agulla, secretario comarcal da Construción de Pontevedra, falou tamén en termos moi positivos e optimistas desta primeira xornada de folga na zona norte da provincia e manifestou que “o sector demanda con esta mobilización un xiro na negociación colectiva e foi unha demostración importante de forza esta folga, e a patronal o que debe facer é tomar nota”. |
|||||||||||||||||||||||
Informacións relacionadas
|
|||||||||||||||||||||||
|
|||||||||||||||||||||||
|
ÚLTIMA REVISIÓN: 24/05/2007 |
|||||||||||||||||||||||
|
