Actualidade Vigo, 25 de maio de 2007 Ábrese a posibilidade de folga indefinida no sector a partir do 15 de xuño Seguimento total da folga da Construción na provincia de Pontevedra na segunda xornada de mobilización   CIG-Comunicación- cig.prensa@galizacig.com   Piquete de traballadores na zona da circunvalación posterior a Citroën. Un grupo de traballadores na zona de Andrés Comesaña, onde atoparon a grande maioría das obras paradas. Na zona do centro de Vigo fóronse xuntando os grupos de traballadores que percorreron as obras pola bisbarra de Vigo e que a partir das dez da mañá concluíron dando un repaso ao centro da cidade. As imaxes son das rúas Policarpo Sanz e García Barbón. Os traballadores da Construción encamiñaron os seus pasos definitivamente cara a concentración da Porta do Sol. Xosé Xoán Melón, secretario nacional da CIG-Construción, fala na intervención final, acompañado de Xaquín Agulla, secretario comarcal da CIG-Construción de Pontevedra e Alberte Fernández, secretario comarcal da CIG-Construción en Vigo. Máis de cincocentas persoas concentráronse desde as doce até pasada a unha da tarde na Porta do Sol de Vigo. Descarga o vídeo. (Formato do vídeo: Windows Media Video [wmv], duración: 2'01'', espazo en disco: 10.318.322 bytes [9,83 Mb]). Realización: César Caramés.   Este xoves 24 de maio volvían “traballar” desde primeiras horas da mañá os piquetes en toda a provincia, aínda que desta volta a maioría das empresas amencían xa pechadas. O paro ampliouse a zonas máis afastadas dos centros das cidades e vilas, e agora desde a Construción chega o momento das avaliacións e reflexións. Segunda xornada de folga no sector da Construción da provincia de Pontevedra e novo éxito en canto ao paro xeneralizado no sector, nas obras das grandes empresas construtoras e en todas aquelas obras visíbeis nas cidades e vilas da provincia. De novo, ás sete e media da mañá comezaban os distintos grupos de piquetes a dividirse nas distintas zonas para percorrer as obras, aínda que este xoves moitas xa aparecían pechadas. De todos xeitos, pódese sinalar que nesta segunda xornada se ampliou o radio de acción dos piquetes, que chegaron a outras zonas onde o mércores non tiveran capacidade de chegar. É de salientar a capacidade de acción dos piquetes na zona do Salnés, onde este xoves paralizaron todas as obras das grandes empresas, e bloquearon a actividade das empresas que están a realizar os recheos no porto de Vilagarcía (Expanosa e Excavaciones Marco), así como as obras da vía rápida do Salnés, entre outras. Concentración na Porta do Sol en Vigo Este xoves desde as doce da mañá concentráronse de novo os traballadores do sector, máis de 500 persoas, que amosaban a súa satisfacción pola incidencia da folga e que cortaron o tránsito no centro de Vigo durante máis dunha hora. Avaliación destas xornadas Xosé Xoán Melón, secretario nacional da CIG Construción, avaliaba á tarde estas dúas xornadas das que dixo que “só se pode facer unha valoración positiva, porque a pesar das dúbidas, por falta de referencia no tempo dunha mobilización destas características no sector, superou as expectativas creadas. Paralizouse totalmente o sector en zonas nas que non se parara na primeira xornada este xoves”. Melón manifestaba tamén que “estabamos acertados ao convocarmos esta folga, porque veu demostrar que a xente está moi cansa da situación do sector e ve en nós a posibilidade de inverter a situación actual”. Melón destacou sobre todo desta folga “a resposta positivísima da xente do sector”. Así mesmo falou dos prazos marcados e o camiño que se abre despois deste conflito: “a semana que vén imos contactar coa patronal, porque agardamos que tomaran nota do acontecido; contactaremos tamén coa Administración, por se houbera algunha nova interlocución ou camiño posíbel neste sentido; e falaremos cos outros dous sindicatos, para ver se teñen vontade de modificar a súa actitude e se queren unirse, porque nós a isto queremos darlle continuidade”. Nese sentido, Melón volveu falar de que se non hai cambios a CIG aposta pola convocatoria dunha folga indefinida no sector da Construción a partir de segunda quincena de xuño.

Informacións relacionadas 24/05/2007 Os traballadores do sector non enfrontaban unha folga pola negociación colectiva desde hai 18 anos Paro masivo na Construción con concentracións en Vigo e Pontevedra 23/05/2007 Xosé Xoán Melón, secretario nacional de CIG-Construción: “Se o noso obxectivo se cumple o 23 e 24 convocaremos folga indefinida na Construción a mediados de xuño” 09/05/2007 Queren promover mobilizacións conxuntas para que se negocie o Convenio colectivo A Federación da Construción da CIG convoca a CCOO e UGT para frear a precariedade no sector 20/04/2007 A CIG desenvolverá unha campaña de información cara a iniciar de inmediato mobilizacións Rotas as negociacións do Convenio provincial da Construción en Pontevedra 01/03/2007 Os pactos de contención salarial fan do Estado español o único da UE en 10 anos no que os salarios medran por debaixo da inflación Concentración por un Convenio provincial da Construción fronte á Patronal en Vigo 14/02/2007 Co 51% da representación sindical A CIG sitúase como primeira forza na Construción na provincia de Pontevedra

Confederación Intersindical Galega www.galizacig.com ÚLTIMA REVISIÓN: 25/05/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta