|
Actualidade CIG-Comunicación-
Os traballadores e traballadoras da Banca tiveron este xoves un punto de encontro e reivindicación nas rúas de Vigo, onde se xuntaron, no cruce de Colón, para defender o interese dos máis de 6.000 traballadores e traballadoras da Banca que se verán afectados pola sinatura do Convenio estatal asinado nesta mesma data en Madrid por CCOO e UGT. Baixo o lema “Convenio galego xa. Aquí traballamos, aquí negociamos!”, os delegados e delegadas visibilizaban o seu rexeitamento a este preacordo que foi negociado “fóra da mesa de negociación legalmente constituída, e onde o sindicalismo centralista pretende aplicar no sector o Pacto de Contención Salarial”, como sinalaba nesta concentración o secretario nacional da Federación da Banca da CIG, Clodomiro Montero. Nesta concentración os traballadores e traballadoras da Banca permaneceron diante das tres sedes dos bancos (BSCH, Banco Pastor e BBVA) que hai neste cruce de rúas entre Policarpo Sanz, Colón e García Barbón durante preto dunha hora.
Aínda que haberá que esperar a coñecer o redactado definitivo, para a CIG os puntos básicos son unha continuidade dos Convenios anteriores: Perda de poder adquisitivo para o ano 2007 e contención salarial para os vindeiros 3 anos restantes, o Convenio é por 4 anos. Baixo berros de “o seu beneficio, o noso sacrificio”, “convenios aquí e non en Madrid” ou “CCOO, UGT, sindicatos do poder”, a concentración desprazábase ás portas dun banco ao outro neste cruce de rúas, no que Clodomiro Montero, secretario nacional da Banca, interviña para manifestar que neste convenio “non hai avances en materia de control da xornada laboral, nin en materia de libranza dos sábados. Tampouco incide en materia de emprego nin na contratación. Este é, polo tanto, un acordo baleiro de contido. Para a CIG quen defenden este Convenio entenden que non é necesario mudar nada nas relacións laborais nos bancos e apostan por deixar as cousas como están”.
Pola contra o apoio maioritario obtido pola CIG nas eleccións sindicais do pasado decembro supón un respaldo claro dos traballadores e traballadoras deste sector a un cambio de marco de negociación e unha aposta clara por un novo modelo de relacións laborais. Nesta mobilización, os delegados e delegadas da CIG denunciaron que este acordo terá un gran custe para a cidadanía. Como contrapartida á sinatura, UGT e CCOO aceptaron que o Goberno central lexisle para que o Fondo de Reserva da Seguridade Social sexa xestionado pola Gran Banca. Un paso máis na privatización da Seguridade Social e un multimillonario negocio para a Banca. |
|||||||||||||
|
|||||||||||||
|
ÚLTIMA REVISIÓN: 22/06/2007 |
|||||||||||||
|
