Actualidade Santiago, 19 de xuño de 2007 A Administración dispón de mecanismos para facilitar que se realicen as probas Demandan do SERGAS que posibilite examinarse a unha embarazada co parto previsto na data da convocatoria   CIG-Comunicación- cig.prensa@galizacig.com   A excusa coa que xustifica o SERGAS a súa inhibición neste asunto é que a convocatoria non prevé esta situación, pero Abuín afirma que “unha convocatoria non está por riba da lei e a lei protexe a maternidade”. (Na foto, de esquerda a dereita, Elvira Patiño Ogea, María Xosé Abuín e María do Carme López Santamariña. ©galizacig.com 18/06/2007).   A Secretaría Confederal da Muller e a CIG-Saúde veñen de denunciar a discriminación dunha muller preñada á que non se lle garante a posibilidade de realizar as probas de oposición ao SERGAS ao coincidir a data do parto coa data na que están convocadas as probas. A CIG exixe que se garanta o seu dereito á igualdade de oportunidades e exixe que a maternidade non sexa causa de exclusión laboral. Trátase dunha facultativa con anos de interinidade que solicitou ao SERGAS que se habilitaran os mecanismos necesarios para poder acceder á OPE que coincide coa data prevista do parto. Porén, malia terse dirixido á Administración en varias ocasións non recibiu resposta algunha. “Entendemos que é unha clara falta de vontade por parte do SERGAS e resúltanos ademais paradóxico porque hai moi pouco tempo que entrou en vigor a Lei de Igualdade en Galiza. Unha lei na que se recollen toda unha batería de propostas dirixidas a acadar a igualdade das mulleres no mundo laboral”, sinala a secretaria confederal Elvira Patiño. Patiño considera que a Administración podería, sen dificultade algunha, desprazar a unha persoa á mesma hora das probas e co mesmo exame ao hospital para que esta muller puidera participar na convocatoria. Pola súa banda, Mª Xosé Abuín, membro da Executiva de CIG-Saúde, matiza que “neste caso aféctalle ao SERGAS, pero a Administración no seu conxunto debe dispor dos mecanimsos necesarios para poder facilitar que o mesmo día do exame calquera muller embarazada poida facer as probas nunhas condicións óptimas”. A excusa coa que xustifica o SERGAS a súa inhibición neste asunto é que a convocatoria non prevé esta situación, pero Abuín afirma que “unha convocatoria non está por riba da lei e a lei protexe a maternidade”. Ademais lembran que en casos semellantes membros do tribunal téñense desprazado aos centros hospitalarios para posibilitar que persoas que estaban imposibilitadas para concorrer ao exame puideran realizalo.

Confederación Intersindical Galega www.galizacig.com ÚLTIMA REVISIÓN: 19/06/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta