|
Actualidade
Vigo, 14 de xuño de 2007
Concentracións diante das instalacións
Folga masiva en Ferroplast por un convenio que recolla as demandas salariais e laborais dos traballadores/as
| |
 |
|
  Descarga
o vídeo. (Formato do vídeo: Windows Media Video [wmv], duración: 1'24'',
espazo en disco: 9.467.510 bytes [9,02 Mb]). Realización: Pequeno. |
|
 |
| Na xornada de folga deste mércores, desde
á primeira quenda de traballo ás seis mañá fixéronse asembleas informando da
situación actual das negociacións do Convenio de Ferroplast, repartindo panfletos e con concentracións
diante das instalacións durante todo o día.
(Fotos: ©galizacig.com 13/06/2007). |
| |
 |
| |
Dous directivos da empresa, con bata branca,
saíron ao exterior de Ferroplast, e un deles increpou aos traballadores en folga que estaban ali concentrados
. |
| |
|
Este mércores 13 de xuño e o xoves
14 a CIG convocou folga na fábrica de Ferroplast despois dun intenso período de infrutuosas negociacións
polo Convenio propio desta empresa do Metal situada en O Porriño. O seguimento da folga foi moi maioritario
e este xoves continuarán as mobilizacións e asembleas de traballadores e traballadoras.
Hai máis dun mes que comezaron as negociacións
polo convenio da empresa, que desde un comezo foron moi complexas. Como a empresa non atendía as demandas
dos traballadores e traballadoras, decidiron deixar de facer horas extras, e comezaron a ter problemas de atención
ao cliente.
Como nas xuntanzas continuaba sen haber avances,
desde o Comité de Empresa decidíronse apurar os prazos e puxéronse nun papel os mínimos
que eran esixíbeis. Neste punto, deron unha semana de prazo, pero a empresa non contestou, polo que se deu
o paso de convocar a folga.
As negociacións colapsáronse na
cuestión da suba salarial, xa que desde a empresa non admiten a última proposta dos traballadores,
que aceitaban unha proposta mínima dun ano de convenio e 1.000 euros para todos os traballadores e traballadoras
en 14 pagas, e a súa única proposta é a dun convenio a tres anos, con subas salariais dun
máximo de tres puntos e medio, e dous puntos que estarían suxeitos aos obxectivos de Citroën,
algo inasumíbel xa que dependerían sempre dun terceiro para o seu salario final.
Reclamacións dos traballadores/as
As reclamacións que desde o Comité
de Empresa (no que a CIG ten 10 delegados/as, UGT 2 e CCOO 1) se realizan son as seguintes:
- Un incremento salarial, porque a xente depende
das horas extras e do traballo nocturno para ter un salario mínimo, xa que nos dous últimos anos
pola situación da empresa houbo un incremento moi baixo, e o seu salario base é de 930 euros. Perderon
nestes dous últimos anos 600 euros con respecto ao resto do sector do Metal. Ademais estes traballadores
e traballadoras agardan con este convenio recibir un salario que recolla a súa ocupación laboral,
que está suxeita á produtividade, porque non poden parar sempre suxeitos a unha cadea, e polo tanto,
contan con que sexa recompensado este esforzo. Nese sentido, o obxectivo do Comité de Empresa é absorber
esa carencia de salario que se tivo durante estes dous últimos anos.
- Anulación da subcontratación dentro
do proceso produtivo: estase a subcontratar á xente para ter persoal máis barato dentro de Ferroplast.
- Reclaman que os eventuais teñan un contrato
mínimo dun ano, para que puideran estes traballadores e traballadoras ter dereito a cobrar a prestación
por desemprego.
- Que a xornada estivera regulamentada, que non
existan calendarios distintos para os traballadores e traballadoras, e que a xornada sexa de luns a venres, agás
nos casos necesarios de mantemento da cadea ou doutro tipo de traballos necesarios nas quendas da fin de semana.
- Aumento das vacacións, xa que estes traballadores
e traballadoras son dos que máis traballan no sector da automoción.
Por estes motivos foron á folga este mércores,
e aínda que o grande escollo é a cuestión da suba salarial, están á espera de
que se retomen ás negociacións que se romperon este martes, despois de todo un día de xuntanzas
coa dirección da empresa e da asembleas cos traballadores e traballadoras.
Este mércores desde á primeira quenda
de traballo ás seis mañá fixéronse asembleas informando da situación actual
das negociacións, repartindo panfletos e con concentracións diante das instalacións durante
todo o día. O seguimento da folga foi amplísimo xa que de feito só houbo cinco traballadores
no interior da fábrica, algún sindicalista de UGT e CCOO e técnicos, que mandaron á
casa ás seis da tarde para pechar ás instalacións da fábrica.
A convocante destas mobilizacións é
a CIG, xa que UGT, pouco antes da folga fixo público un comunicado no que sinalaba que non “era o momento”
desta mobilización.
|
