|
Actualidade CIG-Comunicación-
Con este preacordo, negociado fóra da mesa de negociación legalmente constituída, o sindicalismo centralista pretende aplicar no sector o Pacto de Contención Salarial. Aínda que haberá que esperar a coñecer o redactado definitivo, para a CIG os puntos básicos son unha continuidade dos Convenios anteriores: Perda de poder adquisitivo para o ano 2007 e contención salarial para os vindeiros 3 anos restantes, o Convenio é por 4 anos. Non hai avances en materia de control da xornada laboral, nin en materia de libranza dos sábados. Tampouco incide en materia de emprego nin na contratación. Este é, polo tanto, un acordo baleiro de contido. Para a CIG quen defenden este Convenio entenden que non é necesario mudar nada nas relacións laborais nos bancos e apostan por deixar as cousas como están. Pola contra o apoio maioritario obtido pola CIG nas eleccións sindicais do pasado decembro supón un respaldo claro dos traballadores e traballadoras deste sector a un cambio de marco de negociación e unha aposta clara por un novo modelo de relacións laborais. Durante as concentracións, os delegados e delegadas da CIG denunciaron que este acordo terá un gran custe para a cidadanía. Como contrapartida á sinatura, UGT e CCOO aceptaron que o Goberno central lexisle para que o Fondo de Reserva da Seguridade Social sexa xestionado pola Gran Banca. Un paso máis na privatización da Seguridade Social e un multimillonario negocio para a Banca. Nos vindeiros días analizaremos máis polo miúdo cada unha das “conquistas” do preacordo, á espera de coñecer o texto definitivo do Convenio Colectivo.
|
|||||||||||||||
|
|||||||||||||||
|
ÚLTIMA REVISIÓN: 22/06/2007 |
|||||||||||||||
|
