Actualidade / Artigo A Coruña, 10 de xullo de 2007 Atentado en Iemen   Xurxo Martínez Crespo- xurxomartinez@cantv.net   De esquerda á dereita 7-X, 11-S e 11-M.   No primeiro discurso do presidente de Goberno español, José María Aznar, despois do atentado do 11-M, con plena seguridade, aínda que inconscientemente, responsabilizou a súa participación no masacre de Iraq cos atentados dos trens de Madrid cando dixo: “Matáronos por seren españois”. Ser español, despois do triunvirato Aznar-Blair-Bush é pasar do status de simple cidadán europeo (no caso dos españois, súbditos) a ser branco potencial dun ataque terrorista yihadista. Non están en alerta vermella (nin laranxa, nin verde) polo terrorismo internacional yihadista Irlanda, Canadá nin Portugal. Poño estes tres países porque son fronteirizos cos da “Tripla alianza” que decidiu masacrar o pobo iraquí. Os atentados do 11-S tampouco foron casuais. Todos sabemos da cantidade de veces que se intentara atentar contra os Estados Unidos. No seu momento dixérase que os atentados representaban un atentado contra “a democracia e o estilo de vida occidental baseado nas liberdades...”. Discurso baleiro, cretino e mal intencionado. Os atentados do 11-S e do 11-M nunca foron planeados para Bruxelas, Amsterdam, Oslo, Berna, Estocolmo, Lisboa... que son parte dese mundo occidental do que tanto falamos, xunto con Latinoamérica e as economías “emerxentes” de Asia.   Pescadores do Iemen.   Os atentados, ámbolos dous, foron contra Estados Unidos pola súa política asasina cara ao mundo árabe (pouco tempo despois ratificada cos seus dous tristes tigres-cómplices nos seus ataques a Afganistán e Iraq) e contra o Estado español por esa colaboración, punto ratificado por Aznar cando afirmou que aos ocupantes dos trens “matáronos por seren españois”. Como a realidade sempre supera a ficción e os mortos nunca van ser nin Bush nin Blair nin Aznar (nin os seus “advicers” asesores) o caso é que nos trens de Madrid morreron moitos estranxeiros que a única culpa que cargaban era a de vivir nun país cun Goberno delincuente. No atentado que custou a vida a sete cidadáns do Estado español e dous iemenís (sen contar o suicida) voaron sobre as nosas cabezas as palabras de Aznar, aquelas nas que facía unha relación entre a condición de español e ser obxectivo do terrorismo yihadista. A prensa, que faríamos sen as súas asisadas análises, adiantouse ao medo xeneralizado da poboación e asegurou que o suicida preguntou antes de inmolarse co coche bomba se os turistas eran occidentais.   Neno masacrado polo exército estadounidense en Iraq.   Tamaña andrómena é difícil de crer. Dubido moito que os palestinos, ou iraquís pregunten aos viandantes, antes de activar os explosivos pegados ao corpo, as porcentaxes de xudeus presentes na tenda ou no bus, ou a etnia ou presenza de occidentais en calquera rúa de Bagdad. Non podo afirmar que o triste atentado contra xente inocente fora polo seu pasaporte, pero si podo asegurar que é totalmente incerto que un suicida en Iemen (Estado abertamente colaborador cos Estados Unidos) non recoñeza ou distinga a un iemení dun occidental, e moito menos cando é para asasinalo. A confesión de Aznar, que quedou ancorada no esquecemento, é un mea culpa patriótico. Eu engadiríalle que non só morreron por seren españois, senón que por seren españois pasaron a ese raro rango de obxectivo móbil propio de xentes imperialistas do primeiro mundo. Un coñecido humorista venezuelano da televisión, Joselo, acuñara unha frase entre cómica e cínica que se converteu nun retrouso: “Por eso es que los matan”. Analicen vostedes as razóns polas cales un yihadista querería matarnos, e lamentabelmente, atoparán resposta.

Xurxo Martínez Crespo. (Máis artigos...)

Confederación Intersindical Galega www.galizacig.com ÚLTIMA REVISIÓN: 10/07/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta