|
Actualidade 
A Coruña, 21 de agosto de 2007
Unha sentenza avala que houbo fraude na contratación
e valora a indemnización en 45 días por ano traballado
A Xustiza recoñece a improcedencia de 26 despedimentos de traballadores/as de Atento
| |
 |
| A sentenza, que foi comunicada hoxe, tamén
recoñece a antigüidade da maioría destes empregados/as desde a data da sinatura do primeiro
contrato. (Foto: ©galizacig.com). |
| |
Unha sentenza do Xulgado do Social nº 1
de A Coruña recoñece a improcedencia dos despedimentos de 26 traballadores/as de Atento afiliados
á CIG. O fallo xudicial considera que a situación contractual destes empregados é fraudulenta
ao entender que son persoal indefinido e non persoal contratado por obra, tal como estaban en Atento antes do seu
despedimento.
A sentenza, que foi comunicada hoxe, tamén
recoñece a antigüidade da maioría destes empregados/as desde a data da sinatura do primeiro
contrato. Atento indemnizara até o momento as persoas despedidas con tan só 8 días por ano
traballado, ao considerar que os despedimentos se deben a unha redución de obra por diminución do
volume de chamadas. Esta argumentación da empresa foi rexeitada pola Xustiza valéndose dun informe
da Inspección de Traballo, que indica que mentres en A Coruña se despedía xente no 1004, este
servizo de atención ao cliente se reforzaba con máis contratacións de persoal nos centros
de traballo de Atento en Jaén e León.
A CIG está estudando recorrer esta sentenza
para que se recoñeza a nulidade destes 26 despedimentos. A central nacionalista, ao mesmo tempo, reitera
a súa preocupación acerca da continuidade a curto prazo de Atento na cidade de A Coruña. Estes
temores vense acrecentados polos novos despedimentos no servizo do 1004 noutros centros de traballo do Estado,
como por exemplo o de Valencia, onde se comunicaron recentemente 25 despedimentos máis.
|
