|
Actualidade A Coruña, 13 de agosto de 2007 O secretario comarcal da CIG-Ensino recorre esta sentenza por entender que se conculcaron dereitos fundamentais Eduardo Álvarez é condenado a pagar 200 euros de multa e 5.000 de indemnización
Eduardo Álvarez informou hoxe en roda de prensa que xa presentou esta mesma mañá o correspondente recurso de apelación perante a Audiencia Provincial: «A sentenza foi ditada á medida do denunciante. Eu xa estaba condenado de antemán». O sindicalista, entre outras razóns, referíase as declaracións de Fraga Mandián en La Voz de Galicia o 29 de xullo, antes de que se emitise a sentenza deste caso, nas que o xuíz-decano aseguraba que se ía comprobar «cal é o custe de inxuriar a un xuíz». Eduardo Álvarez manifesta que «chegará até as últimas instancias xudiciais» para defender non só a súa dignidade, «senón a de todos os galegofalantes». O sindicalista asegurou sentirse «cidadán de terceira ou cuarta categoría» e cuestionou a existencia dun verdadeiro estado de dereito. Pilar García Negro, profesora titular do Departamento de Galego-Portugués da UDC, corredactora da Declaración Universal dos Dereitos Lingüísticos e experta en Dereito Sociolingúistico, cualificou de «aberrante» o proceso aberto contra Eduardo Álvarez. «En que modelo de xustiza o exercicio dun dereito se converte nun feito puníbel e perseguíbel», manifestou hoxe García Negro na roda de prensa. A profesora denunciou «as prebendas propias do Antigo Réxime que mantén a casta xudicial» e «o esaxerado» da indemnización imposta a Eduardo Álvarez, «pois é unha medida radical que lle supón a Eduardo a privación do seu salario durante máis de dous meses e medio». García Negro fixo un chamamento ao Fiscal Xefe do TSXG, á Xunta, ao Valedor do Pobo e ao Parlamento Galego a que emitan un pronunciamento acerca da conculcación dos dereitos lingüísticos dos galegofalantes no ámbito xudicial.
O sindicalista entende que foron conculcados gravemente dereitos fundamentais ao longo de todo o proceso e, nomeadamente, no decurso da vista oral, celebrada o pasado 18 de xullo. Por exemplo, a xuíza que presidiu a vista oral foi nomeada polo propio Fraga Mandián con posterioridade á data en que esta causa recaeu no Xulgado de Instrución número 4 de A Coruña, órgano xurisdiccional que leva o caso. «É evidente que se trata este dun caso de deber de abstención da señora xuíza pola súa relación de dependencia e de subordinación gobernativa co denunciante», apunta Eduardo Álvarez. Por outra banda, a xuíza negoulle a Eduardo Álvarez as probas testificais que propuxera ademais da posibilidade de interrogar a testemuña da acusación. A inadmisión de probas testificais propostas polo denunciado conculca flagrantemente o dereito constitucional proclamado no art. 24 da Carta Magna española, ao negarlle a «tutela xudicial efectiva» e mais a utilización «dos medios de proba pertinentes para a súa defensa». A negativa da xuíza a que Eduardo Álvarez, que exerceu a autodefensa, continuase a interrogar o denunciante, o xuíz-decano de A Coruña, e mais a negativa a que interrogase a testemuña proposta pola acusación contraveñen tamén dereitos constitucionais, o artigo 6.3d do Convenio Europeo para a Protección dos Dereitos Humanos e Liberdades Fundamentais e reiteradas sentenzas do Tribunal Constitucional. Ademais, Antonio Fraga Mandián abandonou a sala no medio da vista oral e tamén se alterou a orde fixada publicamente para a celebración do xuízo. A celebración da vista pasou por diante de tres xuízos que o precedían no horario por necesidades de axenda do denunciante, o xuíz-decano de A Coruña. Na última parte da vista, conculcouse o dereito á última palabra do acusado ao tan só permitirlle a xuíza expresarse apenas dous minutos. |
|||||||
| Informacións relacionadas
|
|||||||
|
|||||||
|
|
|||||||
|
