Actualidade / Artigo Vigo, 3 de agosto de 2007 (Publicado en La Región o 31/07/2007) Dados macro que hai que matizar   Manuel Mera- fs@galizacig.net   (Foto: ©galizacig.com).   Semella que nesta época todo se reduce ao auto-bombo, e que calquer reflexión ou análise serio fica esmagada pola propaganda cada vez menos política e máis comercial. O Presidente da Xunta asegura que nunca as cousas foron millor, e baralla dados sobre medre do PIB e diminución do desemprego en Galiza. É nunha primeira leitura as do PIB unha boa noticia macro, porén agochan graves eivas e atrancos que non se poden ignorar. Ante todo, pra centrar o contexto político, cumpre afirmar que millorou a xestión respeito do governo conservador e que existe unha maior sensibilidade social. Mais dito esto, hai que engadir que non se tomou ningunha medida efectiva pra redistribuír a riqueza e millorar as condicións laborais, e tampouco houbo mudanza significativa na cuestión nacional. Aínda estamos a media lexislatura, porén nada indica que se prepare cambio ningún de ritmo e na orientación. E todo eso malia o aumento do PIB ¿que pasará nos tempos malos?... Indo ao tema. Cando se fala do medre do PIB temos que saber que a construción e a inmigración fan de locomotora; e que a primeira a esta altura engade débedas familiares insoportábeis, cuxas consecuencias están por verse. A inmigración suma un problema de integración real e queda das condicións laborais, que aínda non se abordaron. Ademais, a balanza comercial é negativa, o IPC está por riba da media da Unión Europea, e os salarios son moito máis baixos. Estase construíndo sobre unha gándara, ¿canto tempo durará? evitarase un recuar moi duro?... son interrogantes que abren varios escenarios posíbeis, a maioría nada prometedores. A respeito da queda do desemprego as valoracións triunfalistas abraian. Esquecese que o ano pasado ¡setenta e cinco mil persoas! residentes na nosa nación, foron contratadas noutras autonomías do Estado español (onde residen máis de 400.000 galegos, moitos mozos e mozas cualificados), e as oficinas de colocación rexistran 140.000 desempregados con nomes e apelidos (12% da povoación activa). As cifras da EPA son cuestionábeis desde moitos puntos de vista, ninguén confía hoxe nelas, utilizalas non é serio e, o máis importante, non permite traballar pra dar unha saída ao problema. Engadir por último que, na practica, o dado da EPA segundo o cal temos unha porcentaxe de paro máis baixo que a media do Estado, é un dado artificial, un espellismo, que fica reflectido nos miles de inmigrantes que chegan ao país e terminan marchando, e na enxurrada de galegos e galegas que fan o proprio. Ninguén deixa o que vai moi ben e ten tanto futuro,... máxime cando existe a morriña. En resumo, necesitase menos auto-bombo, máis atrevemento e procurar sempre a complicidade participativa da maioría social.

Manuel Mera, secretario confederal de Formación Sindical e Comunicación da CIG. (Máis artigos...)

Confederación Intersindical Galega www.galizacig.com cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta