|
Actualidade
Santiago, 1 de agosto de 2007
A Consellaría de Pesca abre unha vía
de negociación
Os afectados pola obras do Porto Exterior demandan que o Estado asuma a parte principal das indemnizacións
| |
 |
| O colectivo de pescadores e mariscadores o que
demanda é unha indemnización polas perdas provocadas polas obras do Porto exterior. Obras que teñen
inhabilitado a zona de extracción de peixes e mariscos onde adoitaban desenvolver a súa actividade.
Xa no ano 2005 cuantificábanse os danos patrimoniais provocados polas obras nuns 27,6 millóns de
euros. (Foto: ©galizacig.com). |
| |
O pasado luns día 30 de xullo, o colectivo
de afectados polas obras do Porto Exterior de A Coruña celebraban unha asemblea para avaliar o informe emitido
polo Consello de Estado, a resposta da Autoridade Portuaria, que en función deste anunciaba que non asumiría
as perdas provocadas polas obras, e a vía de comunicación aberta pola Consellaría de Pesca.
O pasado xoves día 27 de xullo anunciábase
que a Autoridade Portuaria de A Coruña delegaba a decisión de indemnizar ao colectivo de afectados
polas obras do Porto Exterior de A Coruña.
Esta decisión comunicábase tras
da celebración dun Consello de Administración desta entidade “convocado a última hora e con
secretismo” segundo explica o portavoz do colectivo e secretario comarcal da CIG de A Coruña, Paulo Carril.
Nese Consello de Administración e amparándose
no informe emitido polo Consello de Estado -no que se afirma que sería ilegal achegar axudas ao colectivo-
pretendíase tratar como punto da orde a decisión de denegar toda posíbel indemnización
aos afectados polas obras.
Carril explica que grazas ás presións
exercidas polo colectivo conseguiuse a retirada do punto da orde do día pero matiza que “non queda claro
en que termos esa retirada pretende ser unha porta para reabrir as negociacións con nós para procurar
unha saída satisfactoria”.
O portavoz do colectivo critica que desde a Autoridade
Portuaria se manteña a posición de asumir as teses do Consello de Estado. “Nós xa dixemos
que o informe do Consello de Estado, xa por lei non é vinculante, pero da propia normativa do Consello neste
mesmo informe eles mesmos din que o teñen emitido de forma potestativa, non preceptiva, porque as Autoridades
Portuarias están excluídas do seu ámbito de competencia cando se trata de expedientes de responsabilidade
patrimonial que só serían preceptivos no caso de tratarse de administracións públicas
e no de entes de dereito público, como é o caso”.
Nova vía aberta desde a Consellaría
de Pesca
Neste contexto, tras unha conversa entre a Autoridade
Portuaria e representantes da Consellaría de Pesca e Asuntos Marítimos da Xunta de Galiza, esta anunciaba
a súa intención de estudiar e asumir a execución das medidas necesarias que puideran chegar
a acordarse.
Porén, na asemblea celebrada onte, alén
de valorar a proposta da Consellaría de Pesca, os afectados coincidían en avaliar esta decisión
como unha forma de eludir a Autoridade Portuaria a súa responsabilidade, ao igual que xa fixeran amparándose
no informe emitido polo Consello de Estado. “Se esta é unha cuestión do Estado –en referencia ás
obras e a quen as realiza- terá que ser o Estado quen abone os custos derivados, cando menos na súa
maioría”, afirma Carril.
O colectivo de pescadores e mariscadores o que
demanda é unha indemnización polas perdas provocadas polas obras do Porto exterior. Obras que teñen
inhabilitado a zona de extracción de peixes e mariscos onde adoitaban desenvolver a súa actividade.
Xa no ano 2005 cuantificábanse os danos
patrimoniais provocados polas obras nuns 27,6 millóns de euros, nun estudo realizado polo Grupo de Investigación
da Universidade de Santiago -no que estaban integrados os economistas María do Carme García Negro
e Xan Doldán, entre outros-.
O conflito leva desde principios dese ano (2005)
aberto e transcorridos dous anos aínda non se lle deu unha solución por parte das autoridades competentes.
|
