|
Actualidade CIG-Comunicación-
No seo desta mesma campaña celebrouse o martes 25 de setembro unha xuntanza entre representantes da CIG e do grupo parlamentario popular para tratar sobre a derrogación da disposición adicional 17ª. O PP manifestou que, dado o rexeitamento social que ten suscitado esta medida, estarían dispostos a revisar o asunto se algún grupo parlamentario presenta unha iniciativa neste sentido, pero non a presentala eles. Á xuntanza, que tivo lugar no grupo parlamentario popular cos deputados Manuel Ruíz Rivas e Antonio Rodríguez Miranda, asistiron, en representación da CIG, os secretarios nacionais das Federacións de Ensino e de Administración Pública, Anxo Louzao e Xosé Carlos Crespo. A respecto da resposta do PP, que asumiu a responsabilidade de tomar esa iniciativa –a disposición adicional 17ª introduciuse no texto vía emenda presentada polo seu grupo parlamentario-, Anxo Louzao considera que se trata dun posicionamento claramente insuficiente. “Dá a impresión de que só lles pesa o rexeitamento social pero non teñen a vontade de rectificar a non ser que sexa outro grupo quen o propoña”. En todo caso a CIG agarda que os populares cumpran con ese compromiso e que realmente apoien a derrogación desa disposición. Manifesto O pasado día 17 de setembro entrou en vigor a Lei 13/2007, do 27 de xullo, de reforma da Lei da Función Pública Galega (LFPG), aprobada no Parlamento galego o 17 de xullo. Con ela introduciuse unha disposición adicional 17ª que supón un novo beneficio salarial para aqueles funcionarios e funcionarias que ocupasen cargos públicos de designación política ou diferentes cargos representativos. Mediante esta reforma, os funcionarios e funcionarias ex altos cargos obteñen de por vida un complemento de destino de 14.721 euros anuais (o estabelecido para os directores xerais), que incrementa en 3.000 euros o máximo nivel de complemento de destino existente na carreira administrativa (o nivel 30). Ademais, esténdese a funcionarios e funcionarias que exerceran de alcaldes, deputados, senadores, cargos do poder xudicial e outros cargos de representación institucional, seguindo o modelo do Estatuto básico do empregado público, aprobado a nivel estatal e que xa contara no seu momento coa oposición da CIG. Desde a CIG, entendemos que o correcto sería aproveitar esta reforma da LFPG para rebaixar os privilexios dos funcionarios e funcionarias que ocuparon cargos de designación política, como o seu sistema acelerado de consolidación do nivel 30 (11.721 euros anuais) polo simple desempeño dun alto cargo durante dous anos continuados ou tres con interrupción, introducido por Lei 2/1998, do 8 de abril. Ao contrario, o que se fai é aumentar ese complemento en 3.000 euros máis, creando unha casta privilexiada composta polos funcionarios e funcionarias que ocuparon nalgún momento postos de designación política e que perciben por tal motivo unha retribución á que ningún outro servidor público pode aspirar, por exemplar e brillante que sexa a súa carreira. Igualmente, a medida é discriminatoria, inxusta e desproporcionada en relación con todos os cidadáns e cidadás que non son funcionarios públicos e nalgún momento da súa vida desempeñan cargos públicos ou de representación política; ou co resto da clase traballadora, para os que 14.721€ representan máis que o seu salario de todo o ano. A CIG entende que esta forma de proceder é reflexo dunha concepción elitista da función pública, pola que se crea e prima un corpo de elite, os funcionarios e funcionarias que ocuparon cargos públicos ou de representación política, coa agravante de que se fai con importantes custos para o erario público. Igual de elitistas son as medidas que contemplan os Orzamentos do Estado para 2008, como o incremento dos salarios no 3,5% (0,5% máis que o IPC previsto) ou o estabelecemento dunha indemnización por cesamento para os deputados que leven máis de dous anos no Parlamento. Diante destes feitos, que a CIG considera inxustos, discriminatorios e elitistas, decidimos levar adiante diversos actos de protesta e mobilizacións, así como manter reunións cos tres grupos parlamentarios, para que procedan a derrogar a disposición adicional 17ª da LFPG, así como outros mecanismos legais de consolidación acelerada de grao, como os contidos na Lei 2/1998, do 8 de abril. Se estas medidas non resultasen suficientes, promoveriamos unha Iniciativa Lexislativa Popular co fin de forzar o debate no Parlamento Galego para a anulación deste plus. |
|||||||
Informacións relacionadas
|
|||||||
|
|||||||
|
ÚLTIMA REVISIÓN: 26/09/2007 |
|||||||
|
