|
Actualidade CIG-Comunicación-
Nove traballadores da empresa Vimenca e Áridos de Vilagarcía denunciaron a situación extrema na que se atopan. Dende o mes de xuño non cobran o seu salario. Os empresarios deixaron de pedir material para continuar coa actividade, e desapareceron da empresa desde o mes de abril por problemas persoais entre eles, polo que non hai traballo nin ingresos. Pero tampouco rescinden os contratos dos traballadores, impedíndolles buscar outro emprego. As empresas, situadas no Pousadoiro, adícase á construción de prefabricados de obra. Pero hai meses deixou de pedir material rematando a súa actividade e, por tanto, deixando de percibir ingresos. Os xefes deixaron de “pedir material e de coller pedidos”, polo que pouco a pouco quedaron sen traballo e sen soldo, desapareceron do noite para o día da empresa. Os traballadores presentaron demanda no Xulgado do Social para pedir que a empresa lles rescinda o contrato e poder ir ao desemprego. Pero solicitan tamén que se lles recoñeza a antigüidade, as categorías profesionais e as débedas que a empresa ten con eles. A empresa débelles todo os soldos desde xuño, ademais das pagas extra do ano pasado e deste. Incluso lle cortaron o teléfono á empresa por impago das facturas, aínda que os traballadores seguen acudindo cada día a facer o seu horario e vixiar que non se espolie o que queda alí. Os traballadores, todos afiliados á CIG, agás unha traballadora, consideran “insólito e inadmisíbel que unha empresa que funcionaba peche por un problema sentimental entre os dous socios: Mari Paz Capdevila Cayón e Víctor Méndez Castro”. De ningún saben nada desde hai meses. Nin sequera aparecen a recoller as cartas do Xulgado. Primeiro presentáronse no Xulgado, pero tamén fixeron roldas de prensa e, como esta situación continúa, este venres 28 de setembro os traballadores e traballadoras acudiron a protestar a casa dos xefes, na Rúa da Baldosa de Vilagarcía.
Neste emprazamento e durante máis de media hora, máis de trinta persoas facían ruído, acompañadas de chifres e sereas, para sinalizar a casa deste empresario moroso, que ten varias promotoras ademais deste negocio, así como demandaban que “dera a cara, porque nós o que queremos é traballar, cobrar o que se nos debe e non estar a mendigar”. Até decembro non terá lugar o xuízo, polo que os traballadores continuarán mobilizándose para que se lles escoite e se coñeza a súa situación. As empresas Vimenca e Áridos de Vilagarcía presentáronse no Tribunal do Mercantil por suspensión de pagos, polo que a CIG tamén se personou para representar a estes traballadores e traballadoras como afectadas neste proceso xudicial que se abre. / Zélia García. |
|||||||||||
|
|||||||||||
|
ÚLTIMA REVISIÓN: 29/09/2007 |
|||||||||||
|
