Actualidade Vigo, 5 de outubro de 2007 Afiliada á CIG denuncia persecución sindical Concentración polo despedimento dunha caixeira do Eroski integrante do Comité de Empresa   CIG-Comunicación- cig.prensa@galizacig.com   CIG, CCOO e UGT exixen a reincorporación inmediata ao seu posto de traballo da traballadora despedida, e rexeitan que se continúe a dar calquera tipo de persecución sindical. (Foto: ©galizacig.com 04/10/2007).   Este xoves 4 de outubro ás 12 da mañá e até as 13 horas tivo lugar unha concentración polo despedimento dunha traballadora, caixeira do Eroski desde hai máis de vinte anos, e integrante do Comité de Empresa pola CIG, no que levaba tamén máis de quince anos. A empresa alega fallos no sistema de cobros pero a realidade que con esta concentración se quixo denunciar conxuntamente desde as centrais sindicais CIG, CCOO e UGT, que convocaron unitariamente esta concentración, a situación grave de persecución sindical no Eroski Center, así como reclamar a readmisión desta traballadora ao seu posto de traballo. Desde o Comité de Empresa emitiron un comunicado conxunto no que sinalan “a repulsa pola persecución sindical a que están sometidos certos membros do Comité, e dicimos certos membros, porque sabemos que algún sindicato amarelo ten outros dereitos e por iso está a manterse á marxe de acudir a estas concentracións en apoio á compañeira despedida, polo mero feito de exercer o seu dereito a pertencer a un comité de empresa”. Estas tres centrais sindicais exixen a reincorporación inmediata ao seu posto de traballo, e rexeitan que se continúe a dar calquera tipo de persecución sindical, así como “este tipo de despedimentos por querer exercer os dereitos sindicais lexítimos”. Nesta mesma xornada presentouse ante o Xulgado do Social unha demanda para que este despedimento sexa declarado nulo, así como anunciaron desde as centrais sindicais que continuarán coas mobilizacións “até que a nosa compañeira sexa readmitida”.

Confederación Intersindical Galega www.galizacig.com ÚLTIMA REVISIÓN: 05/10/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta