Actualidade Vigo, 3 de outubro de 2007 Seguimento masivo Éxito na primeira xornada da folga da Construción na provincia de Pontevedra   CIG-Comunicación- cig.prensa@galizacig.com   Este martes 2 de outubro desenvolveuse a primeira xornada na folga polo Convenio provincial da Construción en Pontevedra. Unha folga que continuará os próximos días 3, 4, 9 e 10 deste mes, e que, de non chegarse a un acordo coa patronal, farase indefinida a partir do 16. (Fotos: ©galizacig.com 02/10/2007).   Desde as sete e cuarto da mañá grupos de piquetes comezaban a facer a súa labor desde os locais sindicais e chegaban a inmensa maioría dos centros de traballo do sector da Construción para informar da folga. Aínda así, atopaban a maioría das obras paradas, e podían achegarse a zonas máis illadas, para logo desprazarse a partir das doce á Porta do Sol, onde se concentraban diante da sede da Patronal. Este martes 2 de outubro desenvolveuse a primeira xornada na folga polo Convenio provincial da Construción en Pontevedra. Os sindicatos CIG, organización maioritaria da provincia neste sector, CCOO e UGT convocaron unha folga para esta xornada e os próximos días 3, 4, 9 e 10 deste mes, e que, de non chegarse a un acordo coa patronal, farase indefinida e continuada a partir do 16. O sector, formado por uns 45.000 traballadores en Pontevedra, iniciou os paros en protesta pola ruptura das negociacións coa patronal sobre as melloras provinciais do convenio marco asinado a nivel nacional. Entre as principais reivindicacións do sector están as melloras salariais e o aumento da estabilidade laboral, a posibilidade de que o traballador poida elixir xubilarse de forma anticipada ou a xornada continuada de verán, entre outros aspectos. Piquetes durante todo o día Na cidade de Vigo, os distintos piquetes informativos repartíronse distintas áreas como Cabral e O Calvario, as rúas Aragón e Travesía de Vigo, a zona de Travesas e Gran Vía, a zona de Castrelos, Matamá e o campus universitario, así como Navia, Bouzas e Alcabre, “onde nos atopamos a maioría do traballo feito” sinalaba o responsábel comarcal da Construción de Vigo, Alberte Fernández. Desde a Federación da Construción da CIG da Comarca de Pontevedra, Xaquín Agulla subliñou a escasa intervención dos piquetes informativos durante toda a mañá, o que “amosa a elevada concienciación dos traballadores ante a súa situación laboral, e que en boa medida se debe á folga anterior de dúas xornadas no mes de maio convocada en solitario pola CIG”. Os piquetes nos días vindeiros percorrerán a zona rural das comarcas de Vigo, Pontevedra e doutras localidades da provincia, xa que neste primeiro día se centraron nas obras de construción e grandes obras públicas. Concentración na Porta do Sol Desde as doce da mañá, e durante máis dunha hora e media, centos de traballadores cortaron o tráfico entre a rúa Policarpo Sanz e a Porta do Sol, diante da sede da patronal da Construción. Deste xeito, e con apupos á patronal e asubíos, os traballadores que ao longo da mañá percorrían moitos dos centros de traballo da provincia, encontrábanse no centro neurálxico da cidade de Vigo. Alí, Xosé Xoán Melón, secretario nacional da CIG Construción incidía “na vital importancia deste momento, porque nos queren botar un pulso e temos que ser firmes, para termos o mellor convenio da historia para os traballadores de Pontevedra”, así como fixo un chamamento a continuar coa mesma forza os próximos días.

Informacións relacionadas 29/09/2007 A CIG advirte do posíbel incremento da conflitividade no sector Apoio unánime dos traballadores da Construción á folga convocada a partir do día 2 de outubro 26/09/2007 Xuntanzas con todos os sindicatos Asemblea dos traballadores da Construción en Vigo preparando a folga da vindeira semana 20/09/2007 Os paros serán os días 2, 3, 4, 9 e 10 de outubro e indefinidos a partir do 16 do mesmo mes Convocada a folga da Construción na provincia de Pontevedra 08/09/2007 A patronal presenta proposta provocadora Ruptura das negociacións do Convenio Provincial de Pontevedra da Construción 13/06/2007 Se nunha semana non hai resposta convocarase folga indefinida no sector na provincia de Pontevedra CIG-Construción reúnese coa APEC para fixar unha data máxima para a Mesa Negociadora do Convenio 25/05/2007 Ábrese a posibilidade de folga indefinida no sector a partir do 15 de xuño Seguimento total da folga da Construción na provincia de Pontevedra na segunda xornada de mobilización 24/05/2007 Os traballadores do sector non enfrontaban unha folga pola negociación colectiva desde hai 18 anos Paro masivo na Construción con concentracións en Vigo e Pontevedra 23/05/2007 Xosé Xoán Melón, secretario nacional de CIG-Construción: “Se o noso obxectivo se cumple o 23 e 24 convocaremos folga indefinida na Construción a mediados de xuño” 09/05/2007 Queren promover mobilizacións conxuntas para que se negocie o Convenio colectivo A Federación da Construción da CIG convoca a CCOO e UGT para frear a precariedade no sector 20/04/2007 A CIG desenvolverá unha campaña de información cara a iniciar de inmediato mobilizacións Rotas as negociacións do Convenio provincial da Construción en Pontevedra 01/03/2007 Os pactos de contención salarial fan do Estado español o único da UE en 10 anos no que os salarios medran por debaixo da inflación Concentración por un Convenio provincial da Construción fronte á Patronal en Vigo 14/02/2007 Co 51% da representación sindical A CIG sitúase como primeira forza na Construción na provincia de Pontevedra

Confederación Intersindical Galega www.galizacig.com ÚLTIMA REVISIÓN: 03/10/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta