Actualidade A Coruña, 19 de outubro de 2007 O cadro de persoal permanece unido e valora positivamente o transcurso da folga Os operarios de PLOCOR-2 acusan a UTE de levar o conflito a unha calexa sen saída   CIG-Comunicación- cig.prensa@galizacig.com   Concentración de traballadores da UTE-Plocor no polígono de O Ceao (Lugo). (Foto: ©galizacig.com 18/10/2007).   O 18 de outubro foi a cuarta xornada de folga indefinida na UTE PLOCOR-2, encargada da conservación e mantemento da autovía A-6, N-VI e N-640. A CIG e os traballadores valoran positivamente o transcurso do paro. A unidade é total no cadro de persoal, que non desiste na consecución da readmisión dos dous operarios despedidos, “condición sen a cal os traballadores non pensan entrar a negociar o resto de reivindicacións”, afirma Alfonso Losada, secretario comarcal de Lugo da CIG-Construción e Madeira. “Ou estamos todos na mesa ou non avanzaremos”, engade. O sindicalista fai un chamamento á sociedade e ás autoridades para que o conflito non se prolongue no tempo, “pois podería supor que non se atendese debidamente o servizo que estes traballadores prestan”. “Que ocorrería se o pasado 17 de outubro, por desgraza, houbese un accidente na A-6?” -pregúntase Losada- “Pois sinxelamente que non podería acudir ninguén a sinalizalo ou limpar a calzada, xa que os tres traballadores que facían os servizos mínimos (un vixiante e un retén de dúas persoas) estaban en Baamonde sinalizando o emborcamento na calzada dunha viga de grandes dimensións”, conclúe. Alfonso Losada responsabiliza a patronal da situación e acúsaa de levar o conflito a unha calexa sen saída, “pois se pecha en banda e non acepta a readmisión dos dous traballadores despedidos polo único delito de reclamar, polas vías debidas, melloras nas condicións laborais para o cadro de persoal”. “Froito da responsabilidade e profesionalidade dos traballadores, que saben mellor que ninguén a importancia do servizo que prestan, chegamos a un acordo coa empresa para prorrogar os servizos mínimos unha semana máis”, informa o secretario comarcal lugués da CIG-Construción e Madeira.

Informacións relacionadas 18/10/2007 Os dous operarios despedidos seguen sen ser readmitidos Prosegue a folga dos traballadores da UTE Plocor-2 10/10/2007 Exixen a readmisión de dous traballadores despedidos por reclamar melloras laborais Os traballadores da UTE PLOCOR 2 convocan folga indefinida a partir do 15 de outubro

Confederación Intersindical Galega www.galizacig.com ÚLTIMA REVISIÓN: 19/10/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta