Actualidade A Coruña, 9 de novembro de 2007 Non se contemplan as principais demandas da plataforma sindical A CIG-Santa Bárbara rexeita o acordo do novo convenio de empresa   CIG-Comunicación- cig.prensa@galizacig.com   Dadas as circunstancias negativas que envolveron a negociación deste acordo, nas que a CIG foi un mero ouvinte, a asemblea de afiliados á CIG en Santa Bárbara tomou a decisión unánime de non asinar o acordo sobre o novo convenio colectivo da empresa.   A sección sindical da CIG en Santa Bárbara non asinou o novo convenio colectivo ao non contemplar reivindicacións básicas da plataforma sindical que conformaran no seu día a central nacionalista e mais UGT, que finalmente se descolgou e subscribiu o acordo xunto con CCOO e a empresa. O novo convenio non contempla un incremento maior dos pluses de nocturnidade e turnicidade, dado o uso que a empresa está a facer ultimamente da 3ª e 4ª quenda. O acordo tampouco recolle o plus de distancia ou algún outro factor que corrixa as diferenzas existentes entre traballadores. Do mesmo xeito, o novo convenio non estipula redución de xornada, nin unha nova regulación dos ascensos para aqueles traballadores que leven anos nunha mesma categoría e teñan determinada idade. Tamén ignora a dispoñibilidade por horas de determinados permisos ou contemplar a invalidez permanente total en determinadas pólizas. Polo tanto e dadas as circunstancias negativas que envolveron a negociación deste acordo, nas que a CIG foi un mero ouvinte, nomeadamente na reunión da Mesa Negociadora do pasado 23 de outubro, a asemblea de afiliados á CIG en Santa Bárbara tomou a decisión unánime de non asinar o acordo sobre o novo convenio colectivo da empresa.

Confederación Intersindical Galega www.galizacig.com ÚLTIMA REVISIÓN: 09/11/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta