Actualidade A Coruña, 9 de novembro de 2007 A central nacionalista realiza unha xornada contra os danos inflixidos por estas entidades á saúde dos traballadores Delegados/as da CIG ocupan mutuas en varias cidades galegas   CIG-Comunicación- cig.prensa@galizacig.com   A xornada nacional da CIG contra os abusos das mutuas celebrouse con éxito por todo o país o 8 de novembro. Delegados e delegadas do sindicato ocuparon temporalmente estas entidades en varias cidades da Galiza. (Fotos: ©galizacig.com 08/11/2007). Máis de cincocentos delegados e delegadas asistiron á asemblea de Vigo. En Vigo, delegados e delegadas ocupaban a mutua Fremap á vez que se concentraban fronte a La Universal. Uns 120 delegados e delegadas participaron na asemblea de A Coruña. Ao seu remate, desprazáronse cara a mutua La Fraternidad. Tres furgóns da UIP e un vehículo patrulla da policía española presentáronse no lugar e accederon a interior da mutua. A policía española pretendeu identificar arbitrariamente ao secretario comarcal, Paulo Carril. En Pontevedra, os delegados e delegadas desprazáronse cara as instalacións da mutua Asepeyo, onde denunciaron a actuación destas entidades como “axentes represivos contra a saúde da clase traballadora”. Fronte ás instalacións da Brilat, denunciaron o acoso laboral brutal que sofren as traballadoras da cafetaría. A xornada nacional da CIG contra os abusos das mutuas celebrouse con éxito por todo o país o 8 de novembro. Delegados e delegadas do sindicato ocuparon temporalmente estas entidades en varias cidades da Galiza. Tamén houbo asembleas e concentracións en Vigo, A Coruña, Compostela, Ferrol, Pontevedra, Lugo e Burela. Máis de cincocentos delegados e delegadas asistiron á asemblea de Vigo, que contou coa participación do secretario comarcal, Xerardo Abraldes, de Anxo González Ferreira, membro da Executiva comarcal e responsábel de Formación, e da secretaria comarcal da Muller, Raquel Pazos, que explicou a “Guía de saúde laboral desde unha perspectiva de xénero”, ademais da campaña do sindicato para o 25 de novembro, Día Internacional contra a violencia sobre as mulleres. Pola súa banda, González Ferreira debullou polo miúdo os abusos cometidos polas mutuas, que cualificou como “entidades patronais, obsesionadas en gastar o menos posíbel e lucrarse a costa da saúde dos traballadores”. Ao finalizar a asemblea de Vigo, os delegados e delegadas asistentes dividíronse para realizar dúas concentracións: unha fronte a mutua La Universal e a outra diante de Fremap. Na primeira, baixaron as persianas antes de que chegasen os manifestantes, aínda que o persoal seguía a traballar no seu interior. Simultaneamente, os delegados e delegadas da CIG concentrábanse e ocupaban a mutua Fremap. Ambas concentracións estendéronse até a unha e media da tarde. A Coruña Uns 120 delegados e delegadas participaron na asemblea de A Coruña. Ao seu remate, desprazáronse cara a mutua La Fraternidad, cuxas instalacións ocuparon por espazo dunha hora. Aos vinte minutos de terse iniciado a protesta, tres furgóns da UIP e un vehículo patrulla da policía española presentáronse no lugar e accederon a interior da mutua, onde se atopaba parte dos manifestantes. Cando rematou a ocupación, un axente da UIP dedicouse a anotar a matrícula dun vehículo, propiedade dun membro da CIG, que estaba estacionado diante de La Fraternidad. Esta actitude intimidatoria foille recriminada polos manifestantes á policía española, que pretendeu identificar arbitrariamente ao secretario comarcal, Paulo Carril. Pontevedra Despois da asemblea, máis de 150 delegados e delegadas da CIG tomaron as rúas de Pontevedra con dous obxectivos: desenvolver a campaña do sindicato contra os abusos das mutuas e denunciar, mediante unha concentración fronte ás instalacións da Brilat, o acoso laboral brutal que sofren as traballadoras da cafetaría, cuxa empresa concesionaria é Aguinchos. Igualmente, o acto tamén serviu para protestar polos continuos despedimentos de empregadas afiliadas á CIG pois, de 22 persoas que traballaban nesta cafetaría, xa foron despedidas nove. Posteriormente, os delegados e delegadas desprazáronse cara as instalacións da mutua Asepeyo, onde denunciaron a actuación destas entidades como “axentes represivos contra a saúde da clase traballadora”. Tamén houbo ocupacións e actos de protesta en Compostela, Burela, Ferrol e Lugo.

Ocupacións e actos de protesta en Compostela, Burela, Ferrol e Lugo Compostela, “As mutuas contra e os dereitos da clase traballadora”. Burela, “A Saúde non é un negocio”. Lugo, “Deféndete coa CIG dos abusos das mutuas”. Ferrol, “As mutuas atentan contra a nosa saúde”.

Informacións relacionadas 08/11/2007 Haberá asembleas e concentracións nas comarcas A CIG celebra o 8 de novembro unha xornada nacional contra os abusos das mutuas

Confederación Intersindical Galega www.galizacig.com ÚLTIMA REVISIÓN: 13/11/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta