|
Actualidade CIG-Comunicación-
Parte da representación de Comisións Obreiras na Mesa Negociadora que pertence á Federación de Telecomunicacións ten anunciado tamén publicamente que non asinará o convenio, en tanto que outra parte que pertence a Comfia (federación que dirixe a polémica Mª Jesús Paredes) firmará o convenio. Ante esta situación CIG e CGT teñen chegado a un acordo de convocatoria conxunta de FOLGA para o vindeiro día 7 de decembro, en defensa dun Convenio Digno, contra a precariedade e a deslocalización. A continuación reproducimos o comunicado que a CIG está a repartir nas empresas do sector.
2 euros Un café e un xornal, iso será o que poderemos mercar todos os meses co incremento salarial que pactaron CCOO e UGT para o ano que vén, no preacordo do Convenio Colectivo de Telemárketing. Os salarios subirán o ano que vén o IPC + 0,25%. Subir o IPC é quedarnos co que temos, por riba do que hoxe cobramos os salarios subirán un 0,25% que aplicado sobre os 800 euros supón 2 miserables euros. Por moito que se esforcen en mentir iso é o que gañaremos máis todos os meses co novo e flamante Convenio, un acordo que a CIG non asinará por cutre e miserento. Rebelión a bordo de CCOO e UGT As seccións sindicais de CCOO e UGT en varias empresas de Telemárketing (por exemplo en Eurocen e Atento A Coruña) teñen sacado comunicados en contra do preacordo e a Federación de Telecomunicacións de CCOO anunciou que non firmarán o Convenio, aínda que o faga a Federación de Banca de CCOO (Comfia). Consideran que o Convenio é insuficiente. As empresas anuncian despedimentos Non felices con rirse de nós, subíndonos os salarios dous euros ao mes, o día 27 de novembro o voceiro da patronal anunciaba no diario Cinco Días que as empresas planean despedimentos masivos asociados a deslocalizacion. Suma e segue. Telemárketing en folga o 7 de decembro O preacordo de Convenio está no aire, podemos conseguir que non se asine obrigando ás empresas a negociar un Convenio Digno que garanta o emprego, free a temporalidade e por uns salarios dignos. A maior parte dos 8.000 postos de traballo do Telemárketing en Galiza están en perigo debido á deslocalización. Hoxe, máis que nunca, é preciso que os traballadores e as traballadoras do sector unamos as nosas forzas participando activamente na FOLGA que CIG e CGT convocamos para o vindeiro día 7 de decembro. En todo caso se finalmente CCOO e UGT se pregaran á patronal e asinaran o Convenio Colectivo esta FOLGA quedaría desconvocada. Ante esta posible circunstancia é importante que esteades en contacto cos delegados e delegadas na vosa empresa. Pola nosa dignidade, contra a temporalidade, en defensa dos postos de traballo, o 7 de decembro todos e todas á FOLGA.
|
|||||||||||||
|
|||||||||||||
|
ÚLTIMA REVISIÓN: 30/11/2007 |
|||||||||||||
|
