Actualidade Vigo, 27 de novembro de 2007 Na mobilización participaron unha trintena de organizacións agrarias de todo o continente O SLG manifestouse en Bruxelas para demandar un mundo rural vivo   CIG-Comunicación- cig.prensa@galizacig.com   O SLG manifestouse en Bruxelas, diante da reunión do Consello Agrícola Europeo, en demanda dunha Política Agraria Común que garanta un medio rural vivo en Europa e contra a reforma da PAC, coñecida como “revisión médica”, que se vai realizar en 2008. (Fotos: ©SLG). Para o responsábel de relacións internacionais do Sindicato Labrego, Xosé Ramón Cendán (no centro suxeitando a pancarta), “esta reforma vai a afectar de cheo ao medio rural en xeral, coa redución drástica dos fondos económicos neste capítulo dos orzamentos comunitarios, ou a sectores agrarios tan importantes para Galiza como o leiteiro, coa anunciada liberalización do mercado ao suprimirse o control das cotas, ou o vitivinícola, cunha reforma da organización común de mercado (OCM) en beneficio dos intereses das grandes empresas e multinacionais”.   Unha delegación do Sindicato Labrego Galego, integrada por Xosé Ramón Cendán, Isabel Vilalba e Marcos Louzao, viaxou na madrugada do domingo ata Bruxelas para poder participar o 26 de novembro nunha manifestación en defensa da agricultura labrega europea e dunha Política Agraria Común (PAC) feita á medida das persoas e das explotacións en base a criterios como a lexitimidade, a solidariedade e a sostibilidade; ou, en resume, para reivindicar unha PAC orientada a manter un mundo rural vivo. Na manifestación participaron unha trintena de organizacións que representan a todas as rexións e países da UE, e foi convocada pola Coordinadora Europea da Vía Campesina, a Coordinadora Labrega Europea (CPE) e a Coordinadora de Organizacións Agrarias e Gandeiras (COAG). As e os participantes partiron da Praza de Meeûs ás 10:30 horas, e camiñaron ata Schuman, onde se atopan as institucións comunitarias. Esta mobilización coincidiu, simultaneamente, coa reunión do Consello Agrícola da Unión Europea en Bruxelas xusto nun intre no que se está a debater a reforma da PAC, coñecida como “revisión médica”, que se vai realizar en 2008. Para reivindicar esa PAC alternativa, deseñada en base a persoas e explotacións, e que garanta un mundo rural vivo, unha delegación dos manifestantes mantivo unha entrevista con Jaime Silva, presidente do Consello Agrario Europeo, e cunha representación do Parlamento comunitario. Para o 4 de decembro está prevista unha reunión coa Comisaria de Agricultura, Mariann Fischer Boel. Segundo o responsábel de relacións internacionais do Sindicato Labrego, Xosé Ramón Cendán, “esta reforma vai a afectar de cheo ao medio rural en xeral, coa redución drástica dos fondos económicos neste capítulo dos orzamentos comunitarios, ou a sectores agrarios tan importantes para Galiza como o leiteiro, coa anunciada liberalización do mercado ao suprimirse o control das cotas, ou o vitivinícola, cunha reforma da organización común de mercado (OCM) en beneficio dos intereses das grandes empresas e multinacionais”. Contra isto, o SLG avoga por un control da produción leiteira baseado nun reparto xusto e solidario do dereito a producir, por unha vitivinicultura de calidade que respecte e potencie a produción labrega, as diversidades xeográficas e as nosas denominacións de orixe, e por uns prezos xustos para todos os sectores que cubran os custes de produción nas explotacións e remunere dignamente o traballo de labregos e labregas.

Confederación Intersindical Galega www.galizacig.com ÚLTIMA REVISIÓN: 27/11/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta