Actualidade Vigo, 13 de novembro de 2007 Posíbeis solucións á vista Os alumnos e alumnas da Escola de Artes e Oficios de Vigo volven mobilizarse polo comezo das clases   CIG-Comunicación- cig.prensa@galizacig.com   As alumnas e alumnos continuarán “vixiantes ante todo o que aconteza” co comezo das aulas e o bo funcionamento no futuro desta Escola Municipal. (Foto: ©galizacig.com 12/11/2007).   O luns 12 de novembro ás sete da tarde eran moitos e moitas as que se volvían dar cita nunha nova mobilización da asemblea de alumnos e alumnas da Escola Municipal de Artes e Oficios de Vigo para demandar de novo que comecen as aulas de música tradicional, pintura, música moderna, talla de madeira e encaixe de bolillos, entre outras. Esta mobilización tiña lugar despois dunha asemblea e que se solicitara unha entrevista coa concelleira de Educación de Vigo para que se informara aos alumnos e alumnas do que estaba a acontecer. Esta entrevista tivo lugar a semana pasada e nesta reunión a concelleira escusouse ante os alumnos por herdar este problema da anterior lexislatura municipal do PP e non ser consciente do problema que habería pola ilegalidade e os contratos lixo cos que estaban os profesores desta Escola. Os alumnos e alumnas volveron tanto na xuntanza como nesta mobilización reclamar que comecen as clases canto antes, que se lles teña informados de todo este proceso, e a defensa da calidade no emprego para as profesoras e profesores. Optimismo polas novas Aínda así, amosábanse optimistas co comezo das clases, “pois agardamos que as que non son de música tradicional comecen nun prazo de tres semanas, unha vez solventados os prazos e os problemas, e coa creación da Escola Municipal de Música Tradicional e Folque, que levará a Fundación Son de Seu, agardamos que tamén comecen as aulas, aínda que será moito máis tarde do que agardabamos que fora, e case que perdemos por completo xa o primeiro trimestre, e este xa nunca será un curso completo”. As alumnas e alumnos continuarán “vixiantes ante todo o que aconteza” co comezo das aulas e o bo funcionamento no futuro desta Escola Municipal.

Informacións relacionadas 07/11/2007 Os alumnos solicitan entrevista coa concelleira Continuarán as mobilizacións polo comezo das clases na Escola de Artes e Oficios de Vigo 18/10/2007 Aínda non comezaron as aulas Alumnos e alumnas da Escola de Artes e Oficios de Vigo maniféstanse pola falta de profesorado no centro

Confederación Intersindical Galega www.galizacig.com ÚLTIMA REVISIÓN: 13/11/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta