Actualidade Vigo, 11 de decembro de 2007 A Central de Traballadores Arxentinos ratificou a súa afiliación á CSI cos votos favorábeis do 90% dos congresistas A CIG asistiu en Buenos Aires ao 6º Congreso Ordinario e ao 8º Congreso Extraordinario da CTA   CIG-Comunicación- cig.prensa@galizacig.com   Mesa presidencial dos dous congresos formada polo secretario xeral da CTA, Hugo Yasky, e os secretarios e secretarias da CTA de todas as provincias. (Fotos: ©galizacig.com). A creación dunha Secretaría dos Pobos Orixinarios, co cometido de incorporar á CTA as reivindicacións das culturas indíxenas que aínda subsisten na Arxentina, foi unha das decisións tomadas no 8º Congreso Extraordinario. Unha inmensa faixa con fotografías de desaparecidos e desaparecidas portada polas Nais da Praza de Maio abriu a 27ª Marcha pola Resistencia, esixindo coñecer a verdade do ocurrido cos desaparecidos e aplicar a xustiza a todos os culpábeis.   Durante dous días, 502 delegados a e delegadas chegadas de toda Arxentina déronse cita nas instalacións do Hotel Bauern da capital bonaerense para realizar o congreso ordinario estatutario e un congreso extraordinario. A lexislación arxentina obriga aos sindicatos a realizar un congreso anual que, por norma xeral, limítase a discutir e aprobar o informe de xestión e a rendición de contas. Os congresos extraordinarios, realizados normalmente en coincidencia temporal cos ordinarios, acostuman a seren convocados para a discusión específica de temas de calado político-sindical ou organizativo. Este foi o esquema utilizado pola CTA, incorporando as modificacións estatutarias aprobadas no Congreso do ano pasado polas que se establece que os congresos se realicen por delegados e non por asistencia libre de calquera afiliado ou afiliada. O tema central do Congreso, e o único no que houbo discrepancias que chegaron ás sesións plenarias do último día, xirou arredor da ratificación da afiliación da CTA na CSI (Confederación Sindical Internacional). Despois dun debate extremadamente respectuoso coas opinións expresadas e totalmente correcto nas formas, o Congreso ratificou dita afiliación cos votos favorábeis do 90% dos congresistas. Xa en clave máis interna, os congresistas aprobaron por unanimidade convocar unha “Marcha Federal” para o mes de abril e unha “Constituínte Social Nacional” no próximo mes de agosto na provincia norteña de Jujuy. A destacar tamén a creación dunha Secretaría dos Pobos Orixinarios, co cometido de incorporar as reivindicacións das culturas indíxenas que ainda subsisten na Arxentina. Dentro das actividades congresuais realizouse unha homenaxe moi emotiva ás testemuñas que están declarando nos xuízos contra os xenocidas da ditadura militar arxentina que causante de numerosísimos asasinatos e que fixo desaparecer arredor de 30.000 militantes sociais, políticos, sindicais, culturais... Durante a estadía en Buenos Aires, a delegación da CIG participou en varios actos de carácter reivindicativo e ou sindical: 27ª marcha da resistencia das Nais da Praza de Maio, concentración de traballadores do INDEC, festival musical contra a impunidade, Seminario Sindical Internacional de Saúde Laboral, celebración dos 30 anos da fundación de ASUNATE...

Confederación Intersindical Galega www.galizacig.com ÚLTIMA REVISIÓN: 11/12/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta