Actualidade Santiago, 20 de decembro de 2007 Exixen unha regulamentación menos restritiva CIG-Ensino demanda de Educación a xornada única cantándolle coplas á conselleira   CIG-Comunicación- cig.prensa@galizacig.com   A CIG-Ensino está promovendo unha recollida de sinaturas para exixir a negociación duns novos criterios para implantar a xornada única. (Foto: ©galizacig.com 19/12/2007). Con coplas animaron os delegados e delegadas asistentes a concentración convocada por CIG-Ensino na fría e chuviosa mañá do mércores 19 de decembro. Unha concentración na que se exixiu unha nova regulamentación menos restritiva para que os centros de Primaria e Infantil poidan acollerse á xornada única de ensino. Para que os centros de Infantil e Primaria se poidan acoller á xornada única a Consellaría de Educación estebleceu mediante unha orde que data xa do ano 1993 que a proposta debe ser presentada polos 2/3 do Claustro e do Consello Escolar e contar co voto favorábel dos 2/3 do censo dos pais. A Conselleira de Educación comprometeuse na Mesa Sectorial do día 29 de maio deste ano a negociar uns novos criterios máis flexíbeis para que os centros se poidan acoller á xornada única. Na Mesa Sectorial do 14 de decembro, presentou unha proposta que para a CIG-Ensino supón “unha tomadura de pelo ao conxunto do profesorado”, xa que non reduce a participación dos 2/3 do censo dos votos afirmativos para acollerse á xornada única. Por iso, a CIG-Ensino está promovendo unha recollida de sinaturas para exixir a negociación duns novos criterios para implantar a xornada única que contempla: • Que se elabore unha nova orde que regule a modificación da xornada única na que tanto a xornada partida como a xornada única teñan a consideración de xornadas ordinarias e que para mudar dunha a outra se sigan os mesmos procedementos. • Que para proceder á modificación da xornada se requira a participación do 50% do censo e o voto afirmativo dos 2/3 dos participantes, entendendo un voto por unidade familiar. • Que para a ratificación do tipo de xornada se requira soamente o voto afirmativo da maioría dos membros dos órganos colexiados. • Que a implantación da xornada única non estea condicionada polo transporte escolar e que se supriman as dobraxes do transporte. • Que a Administración educativa garanta a todos os centros os servizos complementarios e as actividades extraescolares, independentemente do tipo de xornada. Coplas á conselleira Estes da Consellaría, nin que lle deran ao tinto. Antes querían dous terzos, agora queren tres quintos. Retrouso: Manda carallo, menuda xoia. Xornada única a Laura non lle enrolla. Xornada única, é necesaria esta xornada pra infantil e pra primaria. Dende a ClG dicimos: Laura non sexas tan viva, no tocante ao da xornada senos menos restritiva. Retrouso No da participación, mira Lauriña o que penso, que debe ser suficiente coa metade do censo. Retrouso Pero coa vosa proposta, corramos tupido velo. Pretender eses tres quintos é tomadura de pelo. Retrouso Se non nos pomos de acordo a cousa ponse máis dura. Pra comezar, suaviño: colleita de sinaturas. Retrouso E xa pra ir rematando dedicámosche este corte. Estamos ata os narices das dobraxes do transporte. Retrouso Aí che vai Laura querida, aí che vai a derradeira. Deixa a xornada ordinaria pra cadaquén como a queira.

Informacións relacionadas 19/12/2007 Demandan que non se condicione a decisión ao transporte escolar Concentración de CIG-Ensino por uns criterios menos restritivos para os centros acollerse á xornada única

Confederación Intersindical Galega www.galizacig.com ÚLTIMA REVISIÓN: 20/12/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta