Actualidade A Coruña, 19 de decembro de 2007 O xuízo contra Xesús Pastoriza celebrarase o 20 de decembro en A Coruña Solicitan até catro anos e medio de cadea para o responsábel nacional da CIG-Transporte   CIG-Comunicación- cig.prensa@galizacig.com   A CIG amosa o seu apoio total a Xesús Pastoriza e enmarca este xuízo dentro da campaña de persecución que sofren habitualmente os seus membros polo desempeño da súa actividade sindical, que sempre está, inequivocamente, ao servizo da clase traballadora. (Foto: ©galizacig.com 18/12/2007). Xesús Pastoriza, responsábel nacional da CIG-Transporte, será xulgado en A Coruña o xoves 20 de decembro, ao estar acusado de ter ocasionado uns supostos danos nos cristais dun autobús da Empresa Monforte o 3 de marzo de 2001. A acusación particular solicita para el catro anos e seis meses de cárcere e o Ministerio Fiscal, tres anos e medio, ademais de ter que pagar unha multa e indemnizar á empresa. Pastoriza nin foi identificado, nin moito menos detido, o día no que supostamente se produciron os feitos. A acusación e a Fiscalía pretenden incriminar o responsábel do Transporte da CIG porque alguén afirmou que vira o seu vehículo nas proximidades do lugar onde estaba estacionado o autobús, no polígono de Bértoa, en Carballo. A Pastoriza impútanlle a comisión de dous delitos: de danos e contra a liberdade dos traballadores. Resulta absurdo que lle atribúan este último, pois a Empresa Monforte non se atopaba en folga. Por tanto, é ridículo forzar un traballador dunha compañía a secundar un paro laboral que non lle afecta. A CIG entende este proceso xudicial como un intento máis do Grupo Monbús, ao que pertence a Empresa Monforte, de amedrentar os sindicalistas da central nacionalista. Trátase pois dunha nova represalia contra a CIG de Raúl López, propietario do Grupo Monbús, pois na altura na que se produciron os feitos que lle imputan a Pastoriza estaba en folga Transportes La Unión, unha das compañías que conforman o Grupo. Raúl López e Juan Gómez Piña, outro directivo de Monbús, son ben coñecidos no sector do Transporte polo seu comportamento antisindical. Ambos están procesados por coaccionar os traballadores de Luber, unha empresa filial, nunha causa que actualmente está levando o Xulgado de Instrución número 2 de A Coruña. A CIG amosa o seu apoio total a Xesús Pastoriza e enmarca este xuízo dentro da campaña de persecución que sofren habitualmente os seus membros polo desempeño da súa actividade sindical, que sempre está, inequivocamente, ao servizo da clase traballadora. A vista contra Xesús Pastoriza celebrarase o xoves 20 de decembro, ás 10:00 horas, no Xulgado do Penal número 5 de A Coruña.

Confederación Intersindical Galega www.galizacig.com ÚLTIMA REVISIÓN: 19/12/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta