ActualidadeVolver a Actualidade


Santiago, 30 de xaneiro de 2008

Chamamento de CIG-Ensino a promover actos nos centros para concienciar o alumnado en contra das guerras
30 de xaneiro: Día Escolar pola Paz

 

CIG-Comunicación-

cig.prensa@galizacig.com


  Nunca Máis a Guerra; clic para aumentar
A CIG-Ensino ten entre os seus obxectivos a Educación para a Paz, e conforme a este considera que a educación debe inspirar, divulgar e propor iniciativas pola paz e o desarme, a solución pacífica dos conflitos, o respecto aos dereitos das persoas e dos pobos e o seu dereito á libre autodeterminación. (Foto: “Nunca Máis a Guerra”. Carteis contra a guerra e pola paz no Instituto Castelao de Vigo. ©Fernando Pol).
 
A CIG-Ensino fai un chamamento a todo o profesorado para a organización de actos escolares co motivo do Día Escolar pola Paz e para denunciar desde os centros de traballo os atropelos e inxustizas que se están a cometer en distintos lugares do mundo, concienciar o alumnado en contra das guerras, promover iniciativas para lograr espazos de liberdade e igualdade, incorporar nos proxectos educativos dos centros a educación para a paz como un eixo de actuación colectivo e apoiar os pobos que loitan pola súa dignidade, liberdade e soberanía nacional.

«Permanentemente somos testemuñas de agresións e ocupacións militares en distintos lugares do mundo: Iraq, Palestina, Afganistán, Líbano, o Sahara son só algúns exemplos actuais. Se isto é preocupante, é aínda maior a nosa preocupación pola indiferenza e a pasividade con que tales feitos son observados por unha gran parte da poboación mundial. Como docentes, debemos concienciar desta circunstancia e situar os nosos obxectivos na formación de persoas independentes, xustas, solidarias, críticas e tolerantes, capaces de reflexionar sobre os perigos que se agochan no sexismo, na xenofobia, na violencia, etc, e capaces tamén de mudar esta sociedade competitiva e violenta na que vivimos.

Desgraciadamente na nosa sociedade vemos que este labor educativo que desenvolvemos nos centros de ensino ten que enfrontarse cunhas dinámicas sociais nas que polo xeral son fomentadas actitudes contrarias como a competitividade, o individualismo e a agresividade.

Para a CIG-Ensino, a educación debe inspirar, divulgar e propor:

  • Iniciativas pola paz e o desarme, unha mellor comprensión e cooperación internacionais e a utilización, con fins sociais, dos recursos destinados ás guerras.
  • A urxencia de rematar co imperialismo, o belicismo, o militarismo e a nuclearización.
  • A necesidade de evitar a difusión social e na escola das ideas e dos heroes insolidarios e violentos, do racismo e do fascismo.
  • A solución pacífica dos conflitos.

Debemos intentar que estes principios formen parte permanente dos contidos que a escola transmite e non restrinxilos soamente á celebración do “Día da Paz”. Para isto, é preciso incorporar no currículo escolar contidos, obxectivos, métodos e técnicas da educación para a paz.

A CIG-Ensino ten entre os seus obxectivos a Educación para a Paz, e conforme a este obxectivo consideramos que a educación debe inspirar, divulgar e propor iniciativas pola paz e o desarme, a solución pacífica dos conflitos e o respecto aos dereitos das persoas e dos pobos e o dereito dos pobos á súa libre autodeterminación».

 
Volver a Actualidade

Volver ao princípio


Ir á páxina de inicio
Confederación Intersindical Galega
www.galizacig.com

ÚLTIMA REVISIÓN: 30/01/2008
cig.informatica


 

web-espello en www.galizacig.org
e
www.galizacig.net (mirrors)


Para estar ao día da actualidade sindical en Galiza, subscríbete á lista de correo da CIG e recibe puntual notificación das
novas informacións, artigos, documentos, publicacións, convenios colectivos... que ofrece a CIG na sua páxina web galizacig.com.

Apúntate en: http://www.elistas.net/lista/galizacig/alta