Actualidade Santiago, 5 de xaneiro de 2008 Contra as deslocalizacións no Telemárketing A CIG impugna xudicialmente a transferencia a Perú de dados persoais de clientes de Telefónica   CIG-Comunicación- cig.prensa@galizacig.com   O recurso da CIG encádrase na intensa campaña que está a desenvolver o sindicato contra o proceso de deslocalización no sector do Telemárketing, que ameaza 3.700 postos de traballo nas maiores empresas situadas na Galiza. (Foto: Pancarta da CIG con motivo do inicio, o 17 de outubro de 2007 en A Coruña, dunha campaña nacional de mobilizacións contra a deslocalización no Telemárketing. ©galizacig.com).   A Sala do Contencioso Administrativo da Audiencia Nacional española está a tramitar o recurso contencioso administrativo interposto pola CIG contra unha autorización de transferencia internacional de dados á filial peruana da empresa Global Sales Solutions Line SL, concedida pola Axencia Española de Protección de Dados (AEPD) á Telefónica Móviles España SA. Este servizo é prestado actualmente pola empresa Eurocen, que dá emprego a cerca de 1.000 persoas na cidade de A Coruña. As autorizacións da AEPD son o paso previo ás deslocalizacións nas empresas de Telemárketing. Apesar do rigor formal da Lei Orgánica de Protección de Dados, que prohibe en termos xerais a cesión de dados persoais con destino a países que non conten cun nivel adecuado de protección, a AEPD interpreta de xeito moi flexíbel as excepcións a esta regra, aceptando como “garantía” un simple contrato entre o importador e o exportador de dados, sempre que incorpore determinadas cláusulas tipo. O recurso da CIG baséase tanto en motivos formais, relativos á forma en que se desenvolveu o procedemento administrativo, como en cuestións de fondo, centradas na omisión dos requisitos de información e consentimento dos titulares dos dados persoais e na ausencia de garantías de que os dados serán debidamente protexidos nun país que a propia Unión Europea cualifica como “non seguro” en termos de protección da privacidade. Faise igualmente referencia ao grave impacto social que estas autorizacións producen no emprego no noso país, ao permitiren o traslado de servizos de teleoperación a países onde o dereito do traballo está tan pouco desenvolvido como a lexislación de protección de dados persoais, nunha práctica que só pode ser cualificada de dumping social. CCOO lava as mans Durante a tramitación administrativa previa á resolución, e como consecuencia da petición feita pola CIG nunha xuntanza anterior, a AEPD dirixiuse a diversas entidades representativas da cidadanía (sindicatos, asociacións empresariais, asociacións de consumidores, etc) para que puidesen formular alegacións. Só a CIG e CCOO fixeron uso deste dereito, aínda que con criterio discrepante. Entanto a CIG pedía que non fose autorizada a cesión de dados persoais, a cúpula de CCOO pronunciábase “no sentido de non facer alegación ningunha en contra, por non vérense afectados os intereses do colectivo obxecto da nosa defensa”. O recurso da CIG encádrase na intensa campaña que está a desenvolver o sindicato contra o proceso de deslocalización no sector do Telemárketing, que ameaza 3.700 postos de traballo nas maiores empresas situadas na Galiza.

Informacións relacionadas 28/12/2007 O secretario nacional da Banca e delegadas do sector presentaron ao deputado Fernando Blanco un paquete de medidas urxentes A CIG solicita do BNG apoio a súa proposta contra a deslocalización do Telemárketing 22/12/2007 Cun seguimento do 90%, empresas como Atento, Bosch ou Eurocen estiveron practicamente pechadas Telemárketing: Unha folga con carácter galego 21/12/2007 Clodomiro Montero, secretario nacional de CIG Banca “A CIG é un referente no Telemárketing como demostra a folga do día 21” 19/12/2007 Pronunciamentos favorábeis dos Comités de Atento e Eurocen Medra o apoio á Folga no sector do Telemárketing 13/12/2007 Denuncian a precariedade laboral e a deslocalización As centrais sindicais CIG e CGT convocan folga no sector de Telemárketing para o 21 de decembro 01/12/2007 CIG e CGT desconvocan a folga do día 7 e contémplase o anuncio doutra convocatoria inmediata Comfia-CCOO e Fes-UGT asinarán o IV Convenio de Telemárketing o 5 de decembro 30/11/2007 CCOO, UGT e patronal asinan un preacordo de Convenio que amplía a temporalidade e establece salarios de miseria O 7 de decembro CIG e CGT convocan Folga no sector de Telemárketing 18/10/2007 Medio centenar de delegados/as do sindicato concéntranse ás portas de Eurocen en A Coruña Iníciase a campaña de mobilizacións da CIG contra a deslocalización no Telemárketing

Confederación Intersindical Galega www.galizacig.com ÚLTIMA REVISIÓN: 05/01/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta