Actualidade Vigo, 18 de xaneiro de 2008 A Deputación de Pontevedra discrimina aos bombeiros A CIG reclama para o Parque de O Morrazo a suba salarial pactada coa Xunta a nivel galego   CIG-Comunicación- cig.prensa@galizacig.com   Os traballadores reclámanlle á Deputación de Pontevedra unha suba igual á dos Consorcios de A Coruña con efectos retroactivos desde outubro de 2007 no camiño da substitución dos actuais Consorcios Comarcais por un único Consorcio Provincial con xestión pública directa, tal como recolle a disposición adicional 3ª da Lei de Emerxencias de Galiza do ano 2007. (Foto: ©galizacig.com).   Os bombeiros do Consorcio de O Morrazo, xunto cos do Salnés e Baixo Miño, están sendo discriminados salarialmente respecto dos seus compañeiros doutras provincias galegas. Reclaman a equiparación salarial, e de non ser atendidas as súas mobilizacións anuncian peches nos parques da provincia. En A Coruña, a Xunta de Galicia e a Deputación chegaron a un acordo para incrementar os salarios 230 euros ao mes para os bombeiros, 300 euros para os cabos e 100 euros para os xefes de servizo desde outubro de 2007. Esta suba de A Coruña foi consecuencia dun acordo a nivel galego entre sindicatos e Xunta para dignificar os salarios nos consorcios privatizados. A intención da Consellaría de Presidencia de promover estas subas en toda Galiza chocou coa negativa da Deputación de Pontevedra. Nas outras provincias o acordo está ben avanzado. Xuntanza con Louzán O pasado luns 14 os representantes dos traballadores do Consorcio de Bombeiros de O Salnés reuníronse con Rafael Louzán para reclamar esta suba salarial para os tres Consorcios privatizados da provincia (O Morrazo, O Salnés e Baixo Miño). Aínda que o presidente da Deputación se mostrou receptivo ás súas demandas, aínda non obtiveron resposta. Os traballadores reclámanlle á Deputación de Pontevedra unha suba igual á dos Consorcios de A Coruña con efectos retroactivos desde outubro de 2007 no camiño da substitución dos actuais Consorcios Comarcais por un único Consorcio Provincial con xestión pública directa, tal como recolle a disposición adicional 3ª da Lei de Emerxencias de Galiza do ano 2007. De non obter unha resposta inmediata, os traballadores dos tres Consorcios Comarcais (O Morrazo, O Salnés e Baixo Miño) teñen previstas accións reivindicativas comezando por un peche nos propios parques de bombeiros xa na seguinte semana.

Confederación Intersindical Galega www.galizacig.com ÚLTIMA REVISIÓN: 18/01/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta