ActualidadeVolver a Actualidade


A Coruña, 24 de xaneiro de 2008

Os presupostos non recollen a suba do 1% da masa salarial para o persoal municipal, entre outros aspectos
A CIG recorre ante o TSXG a aprobación dos Orzamentos do Concello de A Coruña

 

CIG-Comunicación-

cig.prensa@galizacig.com


  Orzamentos; clic para aumentar
A CIG xa presentara alegacións aos Orzamentos municipais no pasado mes de decembro, sen que estas foran tidas en conta polo Goberno local.
 
A CIG interpuxo un recurso contencioso-administrativo perante o Tribunal Superior de Xustiza de Galiza (TSXG) contra a aprobación definitiva do Orzamento do Concello de A Coruña para o ano 2008. O presuposto non contempla, entre outros aspectos, o incremento retributivo para o persoal municipal do 1% da masa salarial dos exercicios 2006 e 2007, tal como prescribe a Lei.

A CIG xa presentara alegacións aos Orzamentos municipais no pasado mes de decembro, sen que estas foran tidas en conta polo Goberno local. O presuposto do Concello para o ano 2008, ademais de non recoller a suba do 1% da masa salarial que ordena a Lei, contempla un incremento do 2% das retribucións complementarias de todos os postos de traballo sen negociación previa, aspecto que incumpre o recollido no artigo 37 da Lei 7/2007 do Estatuto Básico do Empregado Público.

Por outra banda, nos Orzamentos de 2008 créanse dúas partidas concretas para aboar o concepto retributivo de produtividade, separadas da partida xeral, para o persoal dos órganos de Goberno e para o do Servizo de Extinción de Incendios e Salvamento (SEIS) sen a aprobación previa dun sistema obxectivo de avaliación do desempeño. Esta produtividade adxudicouse en contra do estabelecido nos artigos 20 e 24, C da Lei 7/2007, que indican que os sistemas de avaliación do desempeño dos empregados terán que adecuarse a “criterios de transparencia, obxectividade, imparcialidade e non discriminación”.

O Orzamento municipal de A Coruña para o exercicio 2008 publicouse no Boletín Oficial da Provincia o 20 de decembro de 2007.

 
Volver a Actualidade

Volver ao princípio


Ir á páxina de inicio
Confederación Intersindical Galega
www.galizacig.com

ÚLTIMA REVISIÓN: 24/01/2008
cig.informatica


 

web-espello en www.galizacig.org
e
www.galizacig.net (mirrors)


Para estar ao día da actualidade sindical en Galiza, subscríbete á lista de correo da CIG e recibe puntual notificación das
novas informacións, artigos, documentos, publicacións, convenios colectivos... que ofrece a CIG na sua páxina web galizacig.com.

Apúntate en: http://www.elistas.net/lista/galizacig/alta