Actualidade Santiago, 26 de xaneiro de 2008 A punta do iceberg dos graves incumprimentos do Decreto de galeguización do ensino non universitario A Mesa denuncia o “desleixo da Consellaría de Educación” ante casos de aulas de Lingua Galega en castelán   CIG-Comunicación- cig.prensa@galizacig.com   Carlos Callón (esquerda), que compareceu perante os medios acompañado por Fernán Xosé Mourenza, responsábel da Mesa na zona de Lugo, explicou que os niveis de cumprimento do Decreto na comarca son “como no conxunto do país, nada alentadores”. (Foto: ©galizacig.com 24/01/2008).   Aulas de Lingua e Literatura Galega en castelán nun centro de primaria, unha profesora de secundaria que traduce e dita en español aos seus alumnos o libro de Historia que está en galego, ou varios centros onde unicamente a clase de galego se imparte nesta lingua son só “a punta do iceberg” dos graves incumprimentos do novo Decreto de galeguización do ensino non universitario, que estabelece que ao menos o cincuenta por cento das materias se han de impartir na nosa lingua. Así o denunciou o pasado xoves 24 de xaneiro en Lugo o presidente da Mesa pola Normalización Lingüística, Carlos Callón, quen asegurou que todos estes casos “son moito máis que unha anécdota, son o síntoma dun desleixo por parte da Consellaría de Educación, que non está a facer nada para solucionalo”. Callón asegurou que a Mesa vai traballar como garante do cumprimento do Decreto, e explicou que a asociación cívica está a elaborar un informe, que se dará a coñecer cara o remate do curso, no que se recolle información achegada por estudantes, nais e pais e os grupos locais da Mesa pola Normalización Lingüística. O presidente desta asociación asegurou que “os datos que estamos a recoller de momento non son nada alentadores” e denunciou que se manteñen “inercias que veñen xa de anteriores leis que nunca chegaron a cumprirse”. Un plan de formación para o profesorado, campañas de sensibilización e unha labor próxima e dilixente por parte da Inspección educativa son as medidas urxentes que reclama Carlos Callón para intentar acadar un maior nivel de cumprimento da lexislación en materia lingüística. O galego non entra no Conservatorio de Lugo Fronte ao cincuenta por cento que recolle o decreto, a porcentaxe de uso do galego no Conservatorio de Música de Lugo e dun cero por cento. Non hai nin rastro da nosa lingua nin nos materiais nin nas explicacións orais. “Este caso foi denunciado á inspección educativa por pais e nais, e o que fixeron foi lavar as mans”, expuxo o presidente da Mesa. Callón, que compareceu perante os medios acompañado por Fernán Xosé Mourenza, responsábel da Mesa na zona de Lugo, explicou que os niveis de cumprimento do Decreto na comarca son “como no conxunto do país, nada alentadores”. Pola súa banda, Mourenza fixo referencia, ademais de ao Conservatorio, a centros como o Politécnico de Lugo, onde, segundo el, se está a levar a cabo “unha política totalmente belixerante contra a posta en marcha do Decreto”. O responsábel da zona de Lugo da Mesa explicou tamén que “os casos máis graves se dan en educación infantil e primaria”.

Confederación Intersindical Galega www.galizacig.com ÚLTIMA REVISIÓN: 26/01/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta