Actualidade Santiago, 26 de xaneiro de 2008 Desde o inicio do curso hai centros que carecen de orientadores/as maila ter catalogados estes postos CIG-Ensino reclama da Consellaría a dotación de profesorado de orientación para a comarca de Santiago   CIG-Comunicación- cig.prensa@galizacig.com   A CIG-Ensino considera inaceptábel a actitude da Consellaría de Educación que segue obrigando a unha profesora de orientación a compartir dous centros que suman case mil alumnos: CEIP Bispo Guerra Campos (27 unidades, 582 alumnos e alumnas) e CEIP Agro do Muíño de Ortoño (18 unidades, 382 alumnos e alumnas), os dous no Concello de Ames.   A CIG-Ensino leva reclamando desde o inicio de curso, ante a Delegación Provincial da Consellaría en A Coruña, a dotación dunha orientadora ou dun orientador nos centros educativos, como mínimo o número que aparece catalogado na relación de postos de traballo dos centros educativos. Hai centros da comarca de Santiago que necesitan orientadores ou orientadoras, pero os casos máis sorprendentes son a carencia de orientador/a nos centros CEIP Agro do Muíño de Ortoño (Ames) e CEIP O Coto (Negreira) que, malia ter catalogados postos de orientación, seguen sen ser nomeados desde o inicio de curso. A CIG-Ensino considera inaceptábel a actitude da Consellaría de Educación que segue obrigando a unha profesora de orientación a compartir dous centros que suman case mil alumnos: CEIP Bispo Guerra Campos (27 unidades, 582 alumnos e alumnas) e CEIP Agro do Muíño de Ortoño (18 unidades, 382 alumnos e alumnas), os dous no Concello de Ames. Tamén é inaceptábel que o CEIP O Coto de Negreira (6 unidades Infantil e 16 de Primaria) siga, a estas alturas de curso, sen estar dotado dun orientador ou orientadora que legalmente lle corresponde. Desta maneira, a Consellaría desenténdese de postos de servizo necesarios e recoñecidos. “Non se pode dicir dende a Administración que se aposta pola calidade do ensino cando restrinxe a adxudicación de profesorado e outro tipo de persoal solicitado polos centros e máis sabendo que legalmente lles corresponde”, sinalan. CIG-Ensino defende que se catalogue un orientador ou orientadora en centros de 6 ou máis unidades, e considera que por cada 12 unidades máis debe haber un novo posto de Psicoloxía/Pedagoxía. Alén diso, exixe unha solución inmediata, que pasaría por nomear, como mínimo, un orientador ou orientadora para cada un dos centros anteriormente subliñados.

Confederación Intersindical Galega www.galizacig.com ÚLTIMA REVISIÓN: 26/01/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta