Actualidade Vigo, 25 de xaneiro de 2008 Grazas ao peche no parque comarcal Os bombeiros do parque de O Morrazo conseguen un preacordo pola presión das mobilizacións   CIG-Comunicación- cig.prensa@galizacig.com   Os tres Consorcios Comarcais acordaron iniciar o xoves 24 a partir das 9:00 horas un encerro nos parques de bombeiros. Este encerro ía manterse de forma continuada até o luns, pero ao longo da xornada do xoves obtiveron unha resposta da Deputación de Pontevedra, que ofreceu a posibilidade dun preacordo. (Foto: ©galizacig.com 24/01/2008).   Todas as xestións coa Administración resultaron inútiles para resolver a situación de discriminación salarial na que se atopan os bombeiros dos Consorcios Comarcais privatizados da Provincia de Pontevedra (O Morrazo, O Salnés e Baixo Miño). Tiña que ser un peche no parque comarcal que se iniciaba este xoves a mañá, o momento no que distintas xestións fixeron posíbel un preacordo que será transmitido e concretado o luns 28. O único camiño que lles quedou aos traballadores destes Consorcios foi a mobilización para enviarlle unha mensaxe clara á Deputación de Pontevedra, que continuaba negándose a chegar a un acordo coa Consellaría de Presidencia semellante ao chegado en A Coruña, que permitiu nesta provincia incrementar os salarios 230 euros ao mes para os bombeiros, 300 euros para os cabos e 100 euros para os xefes de servizo desde outubro de 2007. Despois dunha xuntanza mantida o martes 22 de xaneiro entre os representantes dos traballadores dos tres Consorcios Comarcais acordaron iniciar o xoves 24 a partir das 9:00 horas un encerro nos parques de bombeiros. Este encerro ía manterse de forma continuada até o luns, pero ao longo da xornada do xoves obtiveron unha resposta da Deputación de Pontevedra, que ofreceu a posibilidade dun preacordo que será concretado nunha xuntanza que manterán os organismos competentes o próximo luns. Os traballadores reclaman unha suba igual á dos Consorcios de A Coruña con efectos retroactivos desde outubro de 2007 no camiño da substitución dos actuais Consorcios Comarcais por un único Consorcio Provincial con xestión pública directa, tal como recolle a disposición adicional 3ª da Lei de Emerxencias de Galiza do ano 2007. Parque de Bombeiros de O Morrazo Ademais, o delegado de persoal do parque de bombeiros de O Morrazo, Rubén Fraga, do sindicato CIG, púxose en contacto co presidente do Consorcio de Incendios de O Morrazo e alcalde de Bueu, Félix Juncal, quen se mostrou solidario coas reivindicacións dos traballadores e ofreceu a súa colaboración para a resolución do conflito. Félix Juncal realizou unha visita aos traballadores encerrados no parque de bombeiros comarcal na tarde do xoves 24 ás 19:00 horas, onde Rubén Fraga lle explicou de maneira pormenorizada as súas reivindicacións e a marcha das mobilizacións. Fraga avaliaba positivamente as xestións e a posibilidade dun preacordo e engadía “que no caso de que non se resolva continuaremos coas mobilizacións, que terán que ser de maior intensidade”.

Informacións relacionadas 22/01/2008 Pola equiparación a nivel galego Os bombeiros dos Consorcios Comarcais de Pontevedra reuniranse coa Xunta para desbloquear o conflito salarial 18/01/2008 A Deputación de Pontevedra discrimina aos bombeiros A CIG reclama para o Parque de O Morrazo a suba salarial pactada coa Xunta a nivel galego

Confederación Intersindical Galega www.galizacig.com ÚLTIMA REVISIÓN: 25/01/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta