Actualidade A Coruña, 24 de xaneiro de 2008 Os traballadores solicítanlle en persoa ao presidente da Xunta que medie neste conflito Tragsega prescinde do 70% dos seus empregados en Lugo para non facelos fixos   CIG-Comunicación- cig.prensa@galizacig.com   Tragsega decidiu non contratar ningún destes traballadores eventuais en xaneiro de 2008 para evitar que se convertesen en fixos e burlar, deste xeito, o Real Decreto 5/2006. Un grupo de traballadores de Tragsega concentrouse o 21 de xaneiro ás portas do Círculo das Artes de Lugo e logrou entregarlle un escrito coas súas reclamacións ao presidente da Xunta. (Fotos: ©galizacig.com 21/01/2008).   Tragsega, empresa de capital público estatal dependente do Grupo Tragsa, prescindiu, no comezo da nova campaña de saneamento gandeiro da provincia de Lugo, dos 75 empregados eventuais que viña contratando desde 2002. A sociedade impide deste xeito que estes traballadores se convertan en fixos. Para realizar a campaña de saneamento gandeiro, Tragsega contrataba por obra ou servizo aproximadamente uns 110 traballadores e traballadoras en Lugo (e máis de 250 en toda Galiza) entre veterinarios/as, administrativos/as, persoal de laboratorio, etc. A devandita campaña realizábase en Lugo e no resto do país desde xaneiro a xullo de cada ano até o 2007, no que se alongou desde o 2 de xaneiro até o 30 de setembro. No momento en que a campaña remataba, aproximadamente as dúas terceiras partes dos empregados (75 traballadores e traballadoras en Lugo) cesaban no seu posto por redución do volume de traballo no campo, aínda que logo eran regularmente contratados de novo ao inicio da seguinte campaña de saneamento. Tragsega decidiu non contratar ningún destes traballadores eventuais en xaneiro de 2008 para evitar que se convertesen en fixos e burlar, deste xeito, o Real Decreto 5/2006. Esta norma contempla a conversión en persoal fixo daquelas persoas quen leven traballando na empresa 24 meses ou máis nos últimos 30 meses. Tragsega pospuxo as incorporacións dos 75 traballadores até maio deste ano co fin de que se produza unha desvinculación maior de seis meses da empresa. Entrega dun escrito a Touriño Coincidindo co acto de celebración do 30 aniversario da Confederación de Empresarios de Lugo, un grupo de traballadores de Tragsega concentrouse o 21 de xaneiro ás portas do Círculo das Artes de Lugo e logrou entregarlle un escrito coas súas reclamacións ao presidente da Xunta, presente na velada.

Confederación Intersindical Galega www.galizacig.com ÚLTIMA REVISIÓN: 24/01/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta