Actualidade Santiago, 8 de febreiro de 2008 Xa se denunciara a actitude antidemocrática da dirección da empresa en decembro a raíz do proceso de eleccións A CIG de Valdeorras adoptará medidas se non frean as presións nos centros da Fundación Valdegodos   CIG-Comunicación- cig.prensa@galizacig.com   Desde que se iniciou o proceso electoral a dirección da Fundación Valdegodos amosou unha actitude antisindical contra a CIG. (Foto: Residencia da terceira idade Virgen de los Milagros. ©galizacig.com).   A CIG de Valdeorras vén de denunciar as actitudes antidemocráticas e revanchistas que están a padecer os traballadores e traballadoras da residencia da terceira idade ‘Virgen de los Milagros’, pertencente á Fundación Valdegodos, desde que se inciou o proceso de eleccións sindicais en decembro. Adriano Brito, secretario da Unión Local da CIG de Valdeorras, explica que desde que se iniciou o proceso electoral a dirección da Fundación Valdegodos amosou unha actitude antisindical contra a CIG. “Exerceron todo tipo de presións cos membros das candidaturas que o noso sindicato presentou en varios centros de traballo desta fundación para que non conseguíramos representación na empresa”, afirma. Brito engade que estas presións xa foran denunciadas o pasado mes de decembro, “cando denunciamos a intromisión de destacados membros do PP”. Porén, as presións cara aos delegados/as da CIG, cara aos traballadores/as que conformaban a candidatura da CIG e cara aos traballadores/as que manifestaron publicamente o apoio a esta candidatura endurecéronse nos últimos tempos. “Agora esas presións estanse a dar nos distintos centros desta Fundación e consisten en cambiar as carteleiras de traballo, negarse a conceder cambios de quenda á xente que apoia á CIG, negarse a selar escritos que os traballadores/as presentan ante a dirección, como por exemplo xustificantes de asistencia médica ou exames ou mesmo retirar do taboleiro de anuncios as comunicacións da CIG”. Dada a situación, a CIG de Valdeorras anuncia que, de non rematar esta situación e as presións que están a padecer os delegados/as e os afiliados/as en xeral, denunciará estas prácticas ante a Inspección de Traballo e tamén ante o Xulgado do Social ou mesmo ante os Xulgados do Penal, en función do que estimen oportuno os servizos xurídicos da central. Alén diso, advirten que se porá en marcha unha campaña de mobilizacións contra a dirección da Fundación Valdegodos e a familia que controla a devandita Fundación.

Informacións relacionadas 27/11/2007 Con motivo do proceso de eleccións sindicais A CIG-Ourense denuncia presións aos traballadores da Residencia da Fundación Valdegodos en Viana do Bolo

Confederación Intersindical Galega www.galizacig.com ÚLTIMA REVISIÓN: 08/02/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta