Actualidade Vigo, 2 de febreiro de 2008 12.000 horas de exceso de xornada A Policía portuaria mobilízase polo calendario laboral e o aumento de persoal   CIG-Comunicación- cig.prensa@galizacig.com   Cos efectivos actuais só poden cubrirse 15.000 xornadas das 25.000 que deberían realizarse. Por esta situación e pola nula actuación da Autoridade Portuaria, a CIG mobilizábase na mañá do venres para visibilizar o conflito existente con unha concentración de delegados e membros do Comité de Empresa. (Fotos: ©galizacig.com 01/02/2008).   O venres 1 de febreiro ás nove da mañá tiña lugar a primeira concentración e chamada de atención á Autoridade Portuaria pola situación laboral que vive o seu corpo de policías, con problemas de persoal e sobrecarga de traballo e xornada. A Policía portuaria de Vigo está composta na actualidade por 1 contramestre, 11 xefes de servizo, 15 xefes de equipa e 59 policías portuarios, dos que 4 aínda son eventuais. En data 1 de febreiro incorpóranse 10 novos efectivos con contrato de seis meses, procedentes dunha bolsa de traballo. No ano 2006, a CIG Portos presentou unha proposta de persoal diante da Autoridade Portuaria de Vigo na que, para cubrir as 25.000 xornadas de traballo que é necesario realizar, serían precisos 130 policías portuarios e xefes de equipa. Esta proposta foi avalada polos traballadores da Policía portuaria e os seus mandos, e apoiada pola totalidade do Comité de Empresa do Porto de Vigo. Cos efectivos actuais só poden cubrirse 15.000 xornadas das 25.000 que deberían realizarse. Por esta situación e pola nula actuación da Autoridade Portuaria, a CIG mobilizábase na mañá do venres para visibilizar o conflito existente con unha concentración de delegados e membros do Comité de Empresa. Resposta de Autoridade Portuaria A Autoridade Portuaria ante esta situación optou por deixar postos de traballo sen cubrir (controis de acceso sen seguridade, zona de interior sen vixilancia), e, pola outra, palía a falla de efectivos facendo traballar aos policías portuarios 12.000 horas de máis da súa xornada establecida en Convenio Colectivo, sen ningunha compensación, ademais de incumprir o Estatuto dos Traballadores e o Convenio de Portos, obrigando a prestar servizo, nalgúns casos, todos os fins de semana nos meses de verán, pretendendo cambialos agora por descansos no mes de xaneiro e febreiro, agudizando a problemática dos niveles de seguridade e calidade do servizo prestado, xa de por si bastante precarios. Ademais, as baixas producidas na Policía portuaria non foron cubertas con novos policías portuarios, empobrecendo máis aínda a calidade do servizo prestado pola Policía portuaria, a súa calidade de vida e das súas familias. Reivindicacións Xurxo Pérez, da CIG Portos, explicou na concentración da mañá as reivindicacións deste colectivo como son “o abono das 12.000 horas extras traballadas en exceso, e súa cotización como tales á Seguridade Social; un cadrante de servizo que incorpore os días de traballo e descanso de todo o ano (cumprir o Estatuto dos Traballadores e o Convenio Colectivo do Porto de Vigo); negociar o incremento de persoal para cubrir as necesidades e mellorar o servizo que préstamos á Comunidade Portuaria.

Confederación Intersindical Galega www.galizacig.com ÚLTIMA REVISIÓN: 02/02/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta