Actualidade Vigo, 28 de febreiro de 2008 Denuncia de CIG-Ensino “Jóvenes empresarios” premia a unha empresa que recorta os dereitos laborais do seu persoal   CIG-Comunicación- cig.prensa@galizacig.com   Para a CIG Enino, “non pode ser un modelo de cultura emprendedora unha empresa –FEMXA– que basea o seu éxito na explotación e no recorte dos dereitos dos seus traballadores e traballadoras, ao estilo da máis rexeitable vella empresa”.   A CIG-Ensino da comarca de Vigo fixo público a través dun comunicado de prensa o seu rexeitamento á concesión do IV Premio Joven Empresario ao grupo de empresas FEMXA, pola súa vulneración constante dos dereitos dos traballadores do seu propio persoal. Este premio, concedido o pasado 14 de febreiro pola Asociación de Jóvenes Empresarios de Galicia, supostamente recoñece importantes méritos logrados polo grupo de empresas FEMXA, que realiza e imparte cursos de formación. A CIG-Ensino quere denunciar que FEMXA se caracteriza por “unha práctica empresarial baseada no menosprezo ao seu persoal que, en condicións precarias, desenvolve o seu traballo baixo o sometemento aos seus xefes na incerteza dun despido fulminante”. Para a CIG Enino, “non pode ser un modelo de cultura emprendedora unha empresa que basea o seu éxito na explotación e no recorte dos dereitos dos seus traballadores e traballadoras, ao estilo da máis rexeitable vella empresa”. Describimos a continuación algunhas prácticas habituais nesta empresa: • Despedimentos masivos inxustificados e sen previo aviso nos que é habitual que a última hora da mañá se lle comunique á traballadora ou traballador que pola tarde xa non volva a traballar. Os servizos xurídicos da CIG teñen gañado numerosas demandas por despido improcedente presentadas pola afiliación da central sindical como consecuencia desta práctica. • Cambio constante aos traballadores e traballadoras de empresa en empresa das que constitúen o grupo FEMXA co fin de reducir os seus dereitos. • Negativa da concesión aos traballadores e traballadoras con fillos menores de 9 meses da hora diaria de ausencia ao traballo ou hora de lactación. • Obriga de facer horas extras non remuneradas baixo o pretexto de ter un posto con “horario flexible”. • Condicións de traballo precarias, con dúas persoas en cada mesa, e moitas veces en cadeiras estragadas e nos que o repousapés é un artigo de luxo, sobre todo no local co que conta FEMXA no 1º andar do nº 22 da Travesía de Vigo. • Ameazas constantes de despedimento e comentarios sexistas e de mal gusto dirixidos ao persoal. Por todo o exposto a CIG-Ensino reclama que se lle retire o premio concedido ao grupo de empresas FEMXA que, coa súa práctica, constitúen na realidade un modelo antagónico ao que debe ser unha empresa galega do século XXI.

Confederación Intersindical Galega www.galizacig.com ÚLTIMA REVISIÓN: 28/02/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta