Actualidade A Coruña, 15 de febreiro de 2008 A empresa ten a concesión municipal da limpeza viaria e da recollida do lixo Os traballadores de Cespa en A Coruña iniciarán unha folga indefinida a partir do 3 de marzo   CIG-Comunicación- cig.prensa@galizacig.com   Os representantes dos traballadores denunciaron na asemblea, á que acudiron 280 empregados dos case 400 que ten a empresa na cidade, a falta de vontade negociadora de Cespa e as propostas “irrisorias” que presentou na mesa negociadora. (Foto: ©galizacig.com 13/02/2008).   A asemblea de traballadores de Cespa en A Coruña, empresa encargada da limpeza viaria e da recollida dos residuos sólidos na cidade, decidiu por inmensa maioría ir a folga indefinida a partir das 00:00 horas do 3 de marzo. Os empregados demandan un incremento retributivo e non perder dereitos sociais xa conquistados. Os representantes dos traballadores denunciaron na asemblea, á que acudiron 280 empregados dos case 400 que ten a empresa na cidade, a falta de vontade negociadora de Cespa e as propostas “irrisorias” que presentou na mesa negociadora. A compañía propón un incremento salarial de 0,5 puntos máis o IPC máis 100 euros ao ano repartidos en 15 pagas (actualmente un peón percibe 889 euros ao mes). Pola súa banda, a parte social reclama unha suba conforme ao IPC máis 650 euros anuais e un aumento do 25% do salario base en concepto de plus de nocturnidade e tamén do 25% a través do plus de toxicidade e perigosidade. Os traballadores esixen a implantación da xornada continuada de mañá durante todo o ano para os empregados das oficinas, que todo cadro de persoal traballe en bloques de 9 días (6 de traballo e 3 de descanso), percibir o 100% do soldo en caso de incapacidade temporal e aumentar a tres os días do ano nos que non se traballe (até agora son dous).

Confederación Intersindical Galega www.galizacig.com ÚLTIMA REVISIÓN: 15/02/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta