Actualidade Vigo, 13 de febreiro de 2008 A CIG ten previstas mobilizacións así como asembleas de traballadoras e traballadores Vaga represiva na empresa de Telemárketing BOSCH en Vigo   CIG-Comunicación- cig.prensa@galizacig.com   O día 21 de decembro o seguimento da Folga en Bosch foi practicamente total, sendo a concentración nesta empresa a que maior número de traballadores e traballadoras sumou en todo o Estado. Ese mesmo día a empresa asumía o compromiso de sentarse a negociar melloras extra-convenio. (Fotos: ©galizacig.com)   Unha delegada elixida nas eleccións do 20 de decembro e unha candidata do mesmo proceso despedidas; outros delegados da CIG sufriron cambio de quendas ou de campañas; despedimentos e sancións sen motivo son a parte máis evidente da vaga represiva no call center da multinacional Bosch en Vigo. Comunitel era unha empresa galega de comunicacións que medrou co apoio, subvencións e suculentos contratos coa Administración pública galega. Todos os servizos de atención aos clientes estiveron sempre subcontratados a través do call center de Bosch en Vigo. Posteriormente Comunitel foi adquirida pola sueca Tele-2 que vén de ser adquirida á súa vez por Vodafone. O pasado 20 de decembro a CIG gañaba as eleccións para a ampliación no Comité de Empresa, a primeira vez que o sindicalismo nacionalista conseguía a maioría nunha gran empresa do sector. O día 21 de decembro o seguimento da Folga en Bosch foi practicamente total, sendo a concentración nesta empresa a que maior número de traballadores e traballadoras sumou en todo o Estado. Ese mesmo día a empresa asumía o compromiso de sentarse a negociar melloras extra-convenio. O pasado 15 de xaneiro era despedida unha delegada da CIG, a única entre o persoal de estrutura. Na última reunión con RRHH mantida a semana pasada a empresa comprometeuse a estudar a situación e a falar antes da mediación no SMAC prevista para o vindeiro luns 18 de febreiro. Pero en lugar de afrontar a reincorporación da traballadora inxustamente despedida ten iniciado unha nova vaga represiva. Ao longo desta semana varias persoas que estaban de baixa recibiron notificacións de despido; cando menos outras dúas persoas foron sancionadas con suspensión de emprego e soldo nun caso por chegar 1 minuto e 44 segundos tarde (segundo a empresa), no outro por non estar conforme cun informe sobre o seu traballo e solicitar a presenza dun representante sindical. O día 12 de febreiro pola tarde era despedida unha candidata da CIG no último proceso electoral, recoñecendo a empresa a improcedencia e sen que a carta de despido recolla o motivo do mesmo (verbalmente a empresa dixo que era porque quería, sen que houbera motivo). A CIG ten previstas mobilizacións na empresa así como asembleas de traballadores e traballadoras para expoñerlles a situación e analizar as medidas a tomar. CIG-Banca, 13 de febreiro de 2008.

Informacións relacionadas 22/12/2007 Cun seguimento do 90%, empresas como Atento, Bosch ou Eurocen estiveron practicamente pechadas Telemárketing: Unha folga con carácter galego 21/12/2007 Con 275 votos, obtivo 6 dos 9 representantes sindicais en xogo A CIG gaña as eleccións sindicais na empresa BOSCH en Vigo cun 70% dos votos

Confederación Intersindical Galega www.galizacig.com ÚLTIMA REVISIÓN: 13/02/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta