Actualidade A Coruña, 4 de marzo de 2008 O cadro de persoal parará todos os mércores en sinal de protesta 300 persoas esixen en Guitiriz a readmisión dos 30 despedidos en Ingemarga   CIG-Comunicación- cig.prensa@galizacig.com   Antonio Niño, da CIG-Construción de Lugo, dirixiuse aos presentes no remate da manifestación e demandou unha implicación activa das Consellarías de Traballo e Industria neste conflito: “A Administración non pode mirar para outro lado e consentir os 30 despedimentos de Ingemarga e as ameazas da empresa contra os traballadores”. (Fotos: ©galizacig.com 01/03/2008).   Por volta de 300 persoas saíron ás rúas de Guitiriz o pasado 1 de marzo para expresar o seu apoio e esixir a readmisión dos 30 despedidos da empresa Ingemarga. Ao mesmo tempo que se desenvolvía a marcha, os comercios da vila pecharon en solidariedade cos empregados represaliados. Antonio Niño, da CIG-Construción de Lugo, dirixiuse aos presentes no remate da manifestación e demandou unha implicación activa das Consellarías de Traballo e Industria neste conflito: “A Administración non pode mirar para outro lado e consentir os 30 despedimentos de Ingemarga e as ameazas da empresa contra os traballadores”, máxime cando se trata dunha empresa “que espoliou a zona” coa explotación de canteiras. O representante da CIG reclamou novamente a readmisión dos empregados, o pagamento dos salarios adebedados e o cumprimento do convenio. “A súa intransixencia é a nosa resistencia!”, exclamou Niño ao rematar a súa intervención. Por outra banda, os representantes da CIG e UGT na empresa acordaron convocar paros de 24 horas todos os mércores até que se consiga a readmisión dos 30 compañeiros que foron despedidos ao negárense a traballar as fins de semana, pois o Convenio da Construción estipula que a xornada é de luns a venres.

Informacións relacionadas 29/02/2008 O sábado 1 de marzo hai convocada unha manifestación na vila chairega 30 traballadores son despedidos en Guitiriz nunha empresa do sector da pedra

Confederación Intersindical Galega www.galizacig.com ÚLTIMA REVISIÓN: 04/03/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta